Newslettter Jan & Feb 2008

MyUpdate 5-14 (Jan & Feb ‘08)

25^th March ‘08

Rawngbawlpui duhtakte,

Pathian min thlahthlam ngai lo tu hmingin Kumthar Chibai ka han buk a che u. Kum 2008 kan lo rah kai leh takah hian ka hun ka chhut kir a, a chang chuan beidawng taka ka awm changte, thinrim tun a ka awm changte, lawmna chhantur hre lova ka awm laite ka nunah kal tlang tam tak ka neih tawh ka ka thlir kira. Pathian rinawmzia leh a laka ka rinawm loh changte awm thin mahse a ni chu a thutiamah a ding tlat a ni tih ka hmuhin A hming ka fak a ni. Chau takin kal chang nei thin mah ila a tawpah chuan fak tlak Pathian a nihna ka hmuh thin zia te hi ka sawi lo thei lo a ni. Tuntum ah hian kan thlasik chawlh ka hman dan ka han tarlang leh dawn a ni. A tlai deuh tawh nain tlai hlen ai chuan a tha in ka hria a kan han ziak leh dawn a ni.

Chinese Kum thar Chawlh: Kum tina kan tih thin angin Chinese Kumthar chawlh January thla laihawl atanga, February 25th thleng kan nei leh a. He hunah hian mi tam tak ten zinna hun remchangah an hmang thin laiin kei erawh chu Thlasik Mutna (Hibernation) hun tha tak ka nei theih phah a ka lawm hle. Semester khat an zawh hi chuan rin ai hian a lo chauh theih ve hle mai a, chuvang chuan zin tura min sawmna pawh ti hlawhtling lovin hahdam nan hun ka hmang.

Hotpot kan nau nen: Chinese eirelah hian Hotpot an tih mai hi a lar em em a. Restaurantah chuan steel thleng lianah hian kan eitur hi kan inchhum chawp thin. Hetiang ang deuh hian ka nau nen in lamah Rice cooker hmangin Hotpot kan ei dun a, kan theih ang angin nuam ti takin kan hmang ve a. Hun tha tak kan nei thei a ka lawm hle. Spring Festival hun hi Chinese ho chuan chhungkaw kima hman ngei ngei tura ngaih a ni a, mahse ka nau hi a haw ve theih loh avangin a khua a har hle mai a, a khawhar hnem theih a ka awm hi ka lawm hle.

Dumpling Party: Chinese Kumthar Urlawk ni khan kan hotuten Foregn Teacher te tan Dumpling (Mizoramah chuan Momo kan ti) party min buatsaih sak a. He tah hian dumpling (momo) a huhovin kan siam ta lui lui mai a nuam kan ti ve khawp mai. Chuan a hnu a Dinner min buatsaihsak a hlim takin kan hmang ve a ni.

Halpuah hal en: Kum hmasa khan ka thenawmpa nen New Year Eve ah Chinese ho halpuah hal en in zanlaiah kan chhuak a. Tun kum pawh a ngai te te in kan in zui chhuak leh a. Kum hlui thlah zan a halpuah hal hi Chinese culture a bet tlat a ni a, an ngaih dah chuan “Nian” an tih ransa Awle ang deuh ni awm a an ngaih hian; India ram ah chuan sakei mihring ei thin ang deuh hi a ni mai ang chu; kumthar dawn zanah hian mi inchhungah a ruk te a lutin mihring a ei thin in an ngai a. He ransa hring ei hian rawng sen leh eng te, ri bengchheng te a hlau in an ngai a, chuvang chuan kumthar dawn zan hian zan khuain ri an siam bengchheng thin a, an kawngkharah vanneihna lehkha sen a thil ziak an tar bawk thin . Tichuan, a tuk zingah chuan zankhua a he ransa hlauhawm laka an inven theih avangin an in lawmpui liam liam a “Gong xi fa cai” (Congratulations) tiin an in chibai thin. Kumin kum thar thlah zanah pawh an a ri a bengchhengin a ri a mawi tel thei hle. Zanlaiah khawlai fan pawh a hlauhawm hle halpuah an hal nasa lutuk a a kal hlei theih loh a ni, in tih kan palh a hlauhawm hle.

Class tan leh ta: February 25^th atang khan class pawh tluang takin kan tan leh ta a. Pathian hruaina zarah nuam ti takin ka kal ve lah ta hnap hnap a ni.

Hahdam taka ka awm theih avangin ka lawm hle a, semester kan han tan pawh rilru thar nen ka kal thei a ka lawm hle. Bang lova min tawngtaipui thin tute hnenah lawm thu ka han sawi mawlh mawlh a, ka beidawn em em chang pawh a beidawng thei lova min siam tu chu in mi tawngtaipuina a ni tih ka sawi duh a ni. Helai hmunah hian keima thu a kal ka ni lova, kan zavaia kan rawngbawlna a ni tih ka hria a, ka beidawn mai chuan mitam tak ka ti beidawng dawn a ni tih min hriatchhuah tir thin a chu chuan min la kal tir ve tang tang thin a ni. Pathianah lawmna tur ka ngah hle mai, lawm chunga a rawng ka bawl zel theih nan min lo tawngtaipui zel turin ka han ngen leh e.

A ropui nen leh a ram a lo zau zel nan

Puii