Newsletter Dec

MyUpdate 5_13 (Dec ‘07)
12 Jan ‘08

Rawngbawlpui duhtak te,

Ringtu te tana thla pawimawh tak mai kan lo hmang zo leh ta. He thla pawimawh tak hi keini helaia rawngbawltu te pawhin kan theih ang tangkaia hman tuma kan lo inbuatsaihna te kan ti hlawhtling thei a. Pathian min hruainaah lawmthu sawina tur ka ngah hle mai. December thla a Pathian hruaina ka dawn te han tarlan leh kan tum dawn a ni.

Thiante duhsakna
Tun kum ka birthday chu school lamah ka buaiber ni a nih avangin ka lawmthei lova. Amaherawh chu ka thenawmte min duhsak tak tak tu ka nei ve leh thin. Ka thenawmten ka birthday lawmnan Japanese restaurant ah min hruai a,nidang a ka ei phak loh te ka ei phah ve a ka lawm hle. Tin, ‘bekang’ an lo nei ve a Mizoram min ti hre chhuak veng veng. Hetiang anga min duhsak tute Pathianin min pe thin hi ka lawm hle.

Krismas chawei khawm chhawng
Tun kum Krismas chu chawei khawm chhawng hnih in ka buatsaih a. A chhawngkhatna a tan 8 December khan ka thiante Jack-a leh a thiannu Helen leh Jenis-i te nen kan pali in ka inah chaw ei khawmna kan nei a. Kan thianpa Jack-a hi kan computer a chhiat apianga kan koh thin, buai leh buai loh pawh sawi lova kan mamawh hun apiang a min pui thin a ni a, nasa takin kan tangkai pui a ni. Krismas Thing te kan chei hova, kan phak tawk a nuamin kan hmang ve a. Tin, Krismas awmzia pawh tlemte kan sawi thei.

A chhawng hnihna atan ka naute Pathianthu kar tina ka zirtir thin te leh a fala ka kawm thinte, 16 December khan a huhovin chaw eiah ka sawm khawm veleh thung. Tuntum chu kum dang ang lovin an eirawngbawl ka ei ve thung. A mal te te in an chawhmeh siam thiam an thawh khawm theuhva chu chu kan ei hova nuam kan ti ve hle.

December thla hi school calendarah chuan kan buai lai ber a ni awm e. School a department hrang hrangten Christmas program te an siam ve thin a. Tin, exam neuh neuh tam thla a nih bawk avangin ka naute nen hian duh angin hun kan hmang tha thei lova pawi ka ti hle. Chawei kham velah class lamah an kal leh dial a ngai a duh ang pawhin kan ti ti hman lova pawi ka ti hle.

Yangze lui dung lamah
Tun kum chu kan Waiban (Foreign Affairs Department) ten Yangze lui dung fang a zin theihna min siam sak a. He lui dung hi khawvel a tuikhuah lianber China sorkar in a siamna hmun kha a ni a. He tuikhuah hian mithiamte inkarah inhnialna a chawkchhuak nasa hle. University in kan kal man chanve dawn lai an tum avangin he hun hi bawhpelh loh hram ka duh ve sia. Tichuan, 20 December tlaiah Xi’an chhuahsanin Chongqing khawpui kan thlawkthla a. Hemi zan atang hian lawngah 24 December thleng khan Yangze luidung kan zawh thla ta a, tuikhuah lian an siamna hmun Yichang an tih khawpui thleng chu kan chuang ta a ni.

Yangze lui dung ka zawh hi China ram a ka zin tawhna ah chuan ka rilru khawih pawl tak ani awm e. Ram changkanna (development) avanga mi rethei zawk ten an tawrh nasat zia lui dung tluanin ka hmu thla a, ka rilru a khawih hle. Khaw pakhatah phei chuan zanah Hall pakhatah show an lo nei a, chu an showah chuan sorkar in an khua mipui nuai ruk lai mai a suan laia an rilru nat zia chungchang hi an lo chang a, mittui tla zawih zawihin kan en hlawm a ni. Kan hotupa min hruaitu ber pawhin nidangah chuan thilawmzia min hrilh fiah zung zung thin a, mahse kha mi tum kha chuan ngawirengin kan en thap hlawm a, kan mittui kan hru fap fap hlawm a ni.

Tun tum ka zin hi China sawrkar thiltihtheih zia pawh engemaw chen chu ka hmuh phah in ka hria. Hmun tam takah chuan Thingtlang khua tuiin a chim pil mek te, tuikhuah an zawh hunah phei chuan tui chhunga awm tur khaw tamtak kan hmu a ni. Tin, temple tamtak luidunga awm te pawh sawrkarin hmun sangzawkah a sawn chho mek a, amaherawh chu nasa takin an hlutna an hloh a hriatna kei chuan ka nei a ni. Khaw pakhat kan tlawhah chuan temple kan tlawh a, chu mi hnu ah chuan Dragon Boat race (Lawng inkar siakna) te a huhovin min neih pui a, nuam kan ti hlawm khawp mai.

Kurung mawi tak tak te kan kaltlang a, amaherawh chu tuikhuah an siam hnuah tui hi metre 100 ai maha tam a a than san tawh avangin a nihna dik tak a hlauh nasa tawh hle. Khawvela a “ber” nih duh reng reng a buai ram an nih avangin an tuikhuah hmun pui kan thleng pawh a pui hle mai. “Ship Lock” (Tuikhuah tui kawngkhar) chhawng nga lai kan kaltlang a, kaltlang chhung pawh darkar thum chuang kan hmang a ni. Lawng chuang ngai lo tih taka ka tan chuan experience tha tak a ni. China ram chhung hi Pathian zarah kan khaw bul leh a chhehvel chu ka tlawh ve nasa tawh hle a mahse tuntuma ka zin hi chu nuam ka tih ber pawl leh ka rilru khawih ber pawl a ni awm e. Hetiang ang hun tha min pe tu Pathian chu ka fak a ni.

Krismas Xi’an ah
Yangze lui dung fang a kan zin Krismas tukah kan thleng a. Rel chhunga kan kan thil ei in ka pum a tih nat deuh avangin kan pawlte inkhawm ka zawm thei lova. Amaherawh chu chhun chaw ei chuan kan pawlte ka va zawmve thei. Kan hotupa te chhungkua in kan eitur an buaipui a, kan ruai theh pawh Australian takin kan theh ani. A chang chuan mizo taka kan ruaitheh hi a ngaihawm veng veng thin. Ka dam sam nep deuh avangin ka haw hma a hahchawlhnan hun ka hmang nileng.

Exam chhunzawm leh New Year Party hrang hrang
Krismas hi helaiah chuan chawlh a ni ve lova, amaherawh chu foreigner zirtirtu hote chu duhsakna bik avangin ni hnih chawlh min pe thin a. Tichuan, 26 December ah class kan kal leh ngal a, exam neiin ka buai leh nghal char char. Tin, ka sawi tawh angin, ringlotu ram ni mahse Krismas hian nasa takin Chinese thalai zingah hmun a luah tawh a, a awmze diktak hre miah lo pawh hian an ur ve nasa hle thin. Tun kum pawh hian kan department a pawl hrang hrang hruaitu ten a lawmnan program an siam nasa hle a, keini ho pawh min sawm ve thin a. Zantin deuhthaw hetiang lawmnaah hian ka kal ve a ni. Amaherawh chu Isua a piancham kan lawm ber erawh chu a lang lo thei hle a, Krismas putar ‘Santa Claus’ hian Isua aiin hmun a luah thuk zawk a. Krismas card te pawh Krismas putar lem hlir a chuang hlawm a ni.

Mizote Krismas ruai theh ve
Aizawl Town B Kohhran te hnen atangin duhsakna ropui tak mai kan dawng a. Krismas ruai kan lo theh ve nan tiin Rs. 3000/- lai mai min rawn thawn leh a (Nikumah pawh min rawn thawn tawh). An mi duhsakna a ropui kan ti a kan lawm hle. He an pawisa rawn thawn hian Pi Zomawii hovin Indian Restaurantah ni 31 December khan ruai kan va theh ve in hun tha tak kan va hmang thei. Tin, heta kan pawisa hman bang hi Pi Zomawii min rawn angin Jenis-i nen kan insem leh a ni. Aizawl Town B Kohhran te avanga kan malsawm dawnah kan lawm tak zet a, midangte tana malsawmna an nih zel theih kan duhsakna kan hlan a, a kan tawngtaina pawh a ni.

Lawmna
Tunkum chhunga Pathian min hruaina a ropui ka ti a, tling lo taka a rawng ka bawlve tek tek thinnaah malsawmna tamtak min la vur hi ka phu lo tih chang hi ka ngah hle. A chang chuan beidawnna khurah te ka kal thin, ka dinhmun hi kei chuan khirh tih em em chang te ka nei thin a. Amaherawh chu Job a nun kha min zirtir ni hian ka hre thin. Ka chunga thil thleng te hi a chhan leh avang ka hre lo fo thin a, beidawng taka ka awm chang a awm thin. Nimahsela Job a nun ka en a, harsatna karah pawh Pathian sawichhiat aiin a fak zawk thin. Pathianin Job a lakah a hmel a thuhruk pawhin, Job a chuan beiseina nung nen Pathian a hmuh theih loh hnenah chuan a tlulut tlat thin. A chunga thil thlengah Setana kut thak hnawih a ni tih hre lova Pathian tihah a ruat chung pawhin Pathian a la fak fova. Pathian a hmangaihna leh Pathian tana a rinawmna thuk tak maiah hian zir tur ka ngah hle in ka hre thin. Hetiang anga Pathian hmangaihna thuk ka neih theih nan hian kohhran hote min lo tawngtai sak fo turin ka han ngen a che u. In zavaiin Kumthar chibai ule.

Tling lo taka Pathian tana in rawngbawlpui,

Puii