Sunday, May 23, 2010

MyUpdate 28

MyUpdate 7-28 (February – March 2010)
17th May 2010


Rawngbawlpui duhtakte,

Tirhkoh Paula chuan “Chutichuan Krista thiltihtheihna chu ka chungah a awm theih nan lawm em em in ka chak lohnate hi ka chhuang tawh zawk ang.” (2 Kor 12:9b) a tih angin, chaklohna lo chu chhuantur nei lova rawng kan bawlnate Pathianin a hria a, chaklohna a trangin a rinawmna te a zahngaihna te min hmuhtir fo thrin. Tun trumah pawh hian chau tak chungin a rawng kan bawl trek trek a, Ama tan thahnem lo inti tak chung a ka hmalakna a min tilawmtu te ka han tarlang leh dawn a, in lawm ve ngei ang tih ka ring, in trawngtaina chhanna a nih avangin.

Mal a awl phal lo
Hla siamtu chuan, ‘Malin ka awm lawng, min thlahthlam ngai reng reng lawng e, ka mamawh tinreng min neihtir a” a lo tih hi a tak a tawngtu tan lo chuan thinlungah a chian dan hi a chiang lo fo thrin. Pathian hian ka rawngbawlnaah hian thrianthra tak tak hi min pe thrin a. Tun semesterah pawh hian ka rilru in thrian neih loh ka hlau hle a mahse Pathianin Australia lama kan thawhpui kohhran atranga rawn kal thar nula fel tak thrianthra tak min pe a ka lawm hle. Pathianin mal tak a ka awm hi a phal lo a ni tih ka hria chuvang chuan ka mamawh min hriatsak thrinnaah ka lawm a ni.

Thlan Phiah Fai Kut ah ka naute khuaah ka zin (2-3rd April)
Kan rawngbawlnaah hian kan kan naute an khuaa an va zin hi thil trangkai tak mai pakhat a ni a.Tun trumah pawh hian tu emaw ber khuaah zin ka duh a ka rilru in ka trawngtaia. Hun rei tawh tak atrang khan ka student hlui Tina nu leh pa hi hmuh ka duh em em mai a. Tina pa hian ka Chinese hming min phuah sak a “Puyu” (璞玉-Jade), hming thra tak a nih avangin ka lawm a, chuvang chuan Tina pa hi hmuh ngei ka duh a. Tina I phone number hi ka phone tih bo avangin ka nei si lova, mak tak main midang hmangin ka be pawp thei a. Keimah leh keimah insawm chawpin an khuaah chuan ka va zin ta a. An khua hi kan awmna a trang hian bus a kalin darkar 1:30 vel a hla a ni.

Chinese Kut chawlh a nih avangin mi zawng zawng an zin a maw tih mai tur a ni, bus a chuang turin darkar khat kan intlar phawt a. Kan intlar chhung hian bus lawn inchuh insualte kan thlir vel mai mai a, a thrente chu Police in an pawh thrente a ngai a. Zing dar 9 a kan chhuak chu dar 1 velah an khua kan thleng thei hram a. Kan thlen phei chuan a nu leh pa chu an lo lawm hle mai a. Eiturte min siam sak sawk sawk a, kan eifel a kan chawlh hahdam hnu ah an inbul tlangah an huante min fan pui a. Thingtlang khaw lian vak lo a nih avangin fan tur em em pawh a awm chuang hranpa lova. Ka naute kawmchhakah hian Buddhist temple lian vak lo hi a awm a. Phur tak mai hian ka nau nu chuan min kawhhmuh a, temple chhunga Pathian lem hrang hrangte chuan eng hna nge an thawhte ka zawt a. Thla tin vawihnih inthawina an nei thrin a, an khuaa Buddha ringtu dangte nen, mahse engvanga Buddha ring a inthawi thrin nge a nih ka zawh chuan a chhan a hre lo va, an nu leh pa te lo tih thrin a nih avangin a ti ve mai a ni.

Ka trawngtainaah chuan Pathianin engtin emaw tal ka zin chhung hian kawng min hawnsak ka dil a, hetia kan titi kan titi takah hian Isua ka rin thu te ka hrilh a (Isua hming hi chu an hre ve hlawm
a mahse tunge a nih tak hi an hre lo). Tichuan, tihian min zawt a “Isua chuan a tidam thei em?” “I rin phawt chuan a tidam thei che,” tiin ka chhang a. BP sang a neih avangin a chang chuan a rilru a tih hah thrin thu te min hrilh a.

Ka cham chhung hian, ka nau nu leh pa hian an in lam hna thrulh thrakin an khua leh a chhehvel a hmuh tur awmte min fan kual pui a. Hetianga inpe zo tak mai a min thleng hi a ropui ka ti. Hnamdang daih mah nise inthlahrunna awm miah lovin an bulah nuamti takin ka khawsa ve nawk nawk a, thrawng hi thiam deuh phei ila an bulah hian sawi theih ka van ngah dawn em ka ti vawng vawng a ni.

Ka hawn dawn hian engmah thilhlu pek tur ka nei loh avangin pawi ka ti a mahse an tan trawngtai sak ka duhthu ka hrilh a, lawm takin min trawngtai tir a ka lawm hle. Pathianin a thawh zawm ngei ang tih ka ring.

Dorothy zawhna
April ni 1, class ka kal chu nidanga ka tih thrin angin kan Chainis zirtirtu te office ah ka chawl hahdam a. Hetia ka thrut lai hian kan thawhpui Dorothy a lo lut a, thil engmah dang sawi lo chuan Kristian I ni tiraw min ti a. Ka nih thu ka hrilh chuan, “Pathian hi engvangin nge I rin , a tranpui tak tak thei che em?” tiin zawhna min zawt a. “Pathian ka rin avang hian ka harsatnate hi laksawn/ lakkian a ni lova, harsatna chi hrang hrang hi ka kaltlang a mahse keimah chauhvin heng harsatnate hi ka tawn lova, Pathian nen kan tawn dun a chuvang chuan a tawrh a awlsam phah a, a chhan chu Pathianin heng harsatnate ka kaltlang theihnan hian chakna min pe thrin,” tiin ka chhang a. Kan inkhawmnaa lokalve a duh a mahse Chainis ho nen kan inkhawm ho theih loh avaning Biakin zawnsak ka tiam a. Tichuan, ka nau ringtu te zarah ringtute inkhawmhonaah Gd Friday khan a kal ve ta a.

Dorothy I hian fanu Singapore a lehkha zir a nei a, doctor ten a chhan an hriat theih loh mit lam harsatna a nei a, Dorothy mangang hian Pathian a zawng ta a ni. Holy BB ka pe a, a lawm em em mai a, tin, ka thawhna a ringtu zirtirtuten an theih ang angin Pathianthu an hrilh bawk a, trawngtrai sak a mamawh hle.

Petra leh Pathian Kohna
April ni 6 khan Dorothy restaurant ah chhunchaw eipuiah ka sawm a, hemi ni hian a thriannu Petra a rawn kalpui a. Petra hi ringtu a ni a, mumal takin inhmelhriatna erawh chu kan nei lo. He mi ni hian, Petra I chuan, “Puii, engtinge I khua leh tui, I chhungte, I hna te, engkim kalsan a Chaina ramah hian I lo kal?” min ti a. He zawhna hmang hian ka testimony te ka hrilh a, kan bulah chuan Dorothy Pathian zawngve tran chuan keini pahnih mittui tla zawih zawih a kan ti ti chu min lo thlir tawp mai a. A ngaihna a hrelo hle mai, kan vawi khat inhmuhna ah mittui tla zawih zawihin kan intrawngtai sak.

Petra hian Pathian kohna a lo dawng ve a, mahse tihngaihna a hriatloh avangin Pathian hnenah a lo trawngtai ve mek a. Hemi ni a Pathian min kohna ka dawn leh min hruaina kawng ka hrilh atrang hian Pathianin a thinlungah thil tam tak a tihfiah sak a. Lawm avanga mittui tla zawih zawihin kan intrawngtai sak tawn a. Heng zawng zawng hi restaurant ah, kan bul vela mi zi nuai nuai kara thil thleng a ni. Chaina rama ka thawh hma a Chaina rama Pathianthu sawi hlauhawm zia ka lo suangtuah thrin dan nen chuan a inang lo hle mai. Petra nen hian kan inhmuh chhunzawm zeuh zeuh thrin a, Pathianin min hman ve naah ka lawm takzet a ni.

Shanghai lamah May chawlkh hmangin
Waiyuan (tuna ka thawhna) ka thawh trantirh a ka zirtirte kha 2008 khan an graduate hlawm a. Heng zingah hian ka nau Christine pawh a telve a. Tunah hian Shanghaiah hna thawkin a awm ve a. Hun rei tak atrangin tlawh ka duh hle a, May chawlh remchanga hmangin ka zuk tlawh ve a. He ka nau hi Pathianthu ka zirtir thrin ni mahse rinna lamah hian a thrang vak lova, mahse ka sawi tawh angin Pathianin a kawng a hria tih ka hria. Hun rei tak kan inhmuh tawh loh avangin ka zin chhung hian inpawhna thar thra tak kan nei thei a ka lawm hle.

Trawngtaina
Chaklo tak chung pawh a Pathian zahgaihna ka dawn thrin avangin Pathian ka fak a, mahse lawm chunga rawngbawl ka theihnghilh chang hi a lo awm leh thrin. Lawm chungin Lalpa rawngbawl ka zir zel theih nan in mi trawngtai sakna ka han ngen e.

Pathian ropui ber rawh se

Monday, May 17, 2010

Hnamze_titi (Culture_talk)

Chainis Inneih Dan
Hun engemaw atang khan Chainis hnamzia chi hrang hrang hi rawn tarlan ka duh thin a mahse ka puitling thei ngang lova, tuntum chu vanneih thlak tak maiin a chhan a thrat em avangin hemi chungchang hi ka rawn thaikawi ve dawn a ni.

January ni 23 zingah ka thianpa Simona sms ka hmu a, “Ka nupui neihnaah Mopa thrianah I trang duh em?” tih hi min rawh thawn a. Hmeichhia mopa thriana trang ka la hre ngai si lova min rawn sawm hi mak ka tih mai bakah a phurawm ka ti a, thil thleng zen zen lo a nih avangin phur takin Mopa thrian ah ka tran theih tur thu chu ka hrilh a.

Ka thrianpa Simona hi GIA hnuaia volunteer programme in kum 2007-2008 chhung khan ka thawhna universityah hian a rawn thawk ve a, tin, kan pawl a in an bawk avangin a rawn awmve chhung khan kan inkawm nasa hle a. Chainis nula ngaihzawng a nei a, February 3, 2010 khan Xi’anah an innei a, kei Mopa thrianah ka trang a. Kan pahnih hian foreigner tih takah Chainis hnamzia kan hriatloh mai bakah, inneih dan bik phei chu kan bang bo dun hle mai a. Ka hriat thiam theih chin a an tihdan kan han tarlang ange. Puithunna chi hrang hrang an ngah hle a mahse han tarlang tur chuan zir chian tur a tam deuh avangin ka rawn ziak dipdep lo ang. Tin, ka han tarlante hi a hmun a zirin a inang vek lo bawk.

Palai
Chainis inneih dan hi mizo inneih dan nen inanna awma, mipa chhungten palai kan tir an hian an ni pawhin an tirve a mahse hmeichhia an ni tlangpui.

Innei tura inhualna
Inneih hi rem thlap tur chuan, hmeichhia leh mipa pianni te an zir chiang anga chutah chuan an number inkawp dan a that chuan innei turin an inhaul ang.

Inneihni thlan
Inneihni thlan hi an uluk hle a, number inkawpkim dan atangin an zir chiang anga chutah chuan an inneih ni tur an ruat chauh ang…entirnan, number 3 te 31 te a thra.

Inneih Ni
Thangthar Chainiste hian sapram a inneih dan hi an la nasa ve hle tawh a a bikin inneih kawrah. A chang chuan ringtu nih miah lo te pawhin Biakinah inneihna hunserh an hmang thrin. ‘Wedding Planner’ (Inneih Buatsaihtu) an ruai a, heng mite hian Inneihna hmun cheimawite, thlalak te, inneih kaihruaitute/hunserh hmangtu (compere) an kutah a awm vek thin a, chuvang chuan innei turte tan hian hna a zangkhai phah hle. Tin, sap ho inneih angin Inneih kawrfual var monu hian a ha tlang pui a, a laklawhah kawrfual senin an thlak thin. Mopa in Envelope senah (Hongbao) pawisa thun engemawzat a buatsaih ang. Hemi tangkaina hi nakinah ka rawn tarlang ang.

Han Chainis danah hian inneih hi chhun dar 12 hma ngei ngei a tan tur a ni a, a chhanah chuan sana ban a chho zawnga a kal lai ngei a an inneih hian nupa tuak thar ten an nupa nun an hman tan dan a tha zawngin a kalah an ngai. Dan tlangpuiin zing dar 9 velah hian Moneitu chu monu inah monu lam turin a va kal a, monu in a thlen veleh chuan halpuah an hal chuah chuah a. Halpuah hian Moneituin monu in a thleng tih entirna a nih mai bakah thlarau thalo hnawhdarh nan an hmang bawk. Moneitu chu monu inah luh an tum anga, chhunglam atangin kawngkhar an lo kalh tlat ang. Chutah a kik vak vak anga luh an lo phal lovang. “Envelope sen (Hongbao) min pek phawt loh chuan kan hawng thei lo” an lo ti tlat anga, a lo buatsaihsa envelope sen chu a pe anga chutah an lungawi tawk a pek hunah Kawngkapui an kan tir chauh ang. Inchhung a luh hnuah chuan monu awmna ber room a zawng leh anga room hrang hrang kawngkhar chu a kik zel anga, kawngka hawn tir tur chuan Envelope sen chuan a tlawn zel angai ani. Monu awmna room a hmuh fuh hma chuan kawngkharah chuan a inlei hawn zel angai. Monu awmna room a thlen hunah Monu chu khumah a lo thu anga, pheikhawk sen a khing chauh a lo bun ang, mopa chuan a a pheikhawk khing chu a zawn hmuhsak a a buntir hma chuan room atang chuan a chhuahpui thei lo a ni. A tlangpuiin monu pheikhawk khing hi hmuh harsa deuhah an lo thukru thrin.

Pheikawk an inbuntir hnuah chuan Moneitu chuan monu chu pangpar bawr a pe anga, a hmangaih thu leh neih a duh thu te a hrilh ang. Tichuan, monu chhungte chuan artui chhum hi ‘bawl’ ah tui al tawka inchiah an rawn la anga, Mopa leh a thrian chu an ei tir ang. (he article ka ziah hnu ah thil ka hriat belh ah chuan artui hi thur, thak, kha, thlum pawlh khawm a chhum a ni a hemi ei hian nupa nunkawng hrang hrang a entir a ni, hlimni, trahni, etc)

Hemi hnuah hian Moneitu leh monu chuan monu chhungte thla an lak pui ang a, chumi hnuah chuan hunserh hmanna tur lamah an kal ang. A danah chuan monu hian lei lawng a rap tur a nilova chuvang chhuang mopa hian car chhungah pawm lut thrin. Amaherawh chu a innei a te duh dan te a remchan dan a zirah te a innghat. Inchhawng nga vel atanga inpawm thlak chu thil tih chi vak pawh a ni lo ve thei a, monu sa a thrat viau phei chuan mopa tan thil hautak tak a ni thei!!!

Inneihna hi a tlangpuiin restaurant lian tham deuhah an nei thin. Heng restaurant te hi ‘Inneih Hall’ atana hman nghal theih tura ruahman an ni tlangpui.

Monu leh Moneitu te chuan inneih chhim tura lo kalte chu kawngkharah an lo hmuak ang a, duhsakna inhlanna hun atan an hmang bawk.

Inneih hunserh
Chainis inneih danah hian mipui hriata an lawm hma in Publik Sekiuriti Biuraw ah sorkar phalna an la anga, sorkar atangin Inneih Sertifiket an nei phawt ang. Khawtlang hriata inneih erawh chu an remchan hunah an nei mai thin a, thangtharah chuan khawtlang hriatpui lem lova innei pawh tam tak an awm a ni. Khawtlang hriatpuia inneih hi an innei tak tak ani tih entirna leh a ti famkimtu a ni. Tichuan, hemi ni hian dar 11:56 velah te hunserh an tan thin, sana banin a chho zawnga a kal laiin!!

Chainis inneih hi a tlangpuiin a bengchheng thei hle…tunlai hla lar an play anga, an ri chhuai chhuai thrin. A chang chuan trawng pawh hriatthrat theiloh lek lek thrin. Inneih zungbun inbuntirte puithunna hranpa vak awm lovin an ti ve a, a chang chuan Inneih Sertifiket te an chhiarchhhuak ve thrin. Monu leh Moneitun ten zu no an dawm anga, ban inkhawkherhin an in ang, kunin chibai an inbuk ang.

Ka thrianpa hi Ringtu a nih avangin Baibul atrangin 1 korinth 13:4-8 kha keiin ka chhiarchhuak a, tin, a nu leh pain nupa tuak tharte an tawngtaisak bawk. Hunserh an hman zawh hian monu chuan a kawr a thlak ang a, kawrfual sen a rawn ha thung ang. Restaurantah a nih avaning mipuite chuan chaweina tur dawhkan theuhvah thuttir nghal an ni thrin a, Monu a inthlak hi chuan mipuite pawhin chaw ei an tran ve nghal thrin a ni.

Ei leh in
Hemi ni a eitur bik chhawhmeh hi uluk taka thlanchhuah an ni a, chi engzatnge chhawp tur thlengin awmzia an nei a ni. A tlangpuii chawhmeh chi riat vel an chhawp thrin a, a tawpah noodles nen avaiin pakua. A zat thuah hian an puithunna ah chuan number pariat (ba) hi alam danah vanneihna a kawk a, pakua (jiu) pawh hian thil rei sawiina ri nen a inan avangin number tha tak pahnih an ni.

Chawhmeh hian awmzia a neih avangin duhduh an hmeh thei lo, a tlangpuiin Nghapui mei – hausakna entirnan, vawksa ur hmin – thianghlimna (virginity) entirnan, arsa or sava sa- muanna (peace) entirnan, sangha- a hming lam hian tamtak sawina a kawk a chuvangin nupa tuak thar ten an mamawh zawng zawng an neih theih nan, ar ke te, fanghma te, lotus bulbal te leh thlai dang te.

Zu no tlak kual
Monu kawrsen rawn hak chhuah hnu hian, Chainis hovin ‘bai jiu’ zu var an tih bik chu monu leh moneitu chuan chaweina dawnkan tinah chuan an thiante lakah an lawm entir nan an rawn inkualpui ang. Dawhkan tinah mi 10 vel an thu thrin a, dawkan sawm chuang an thlawh kual chuan nupa tuak tharte chu a chang chuan an rui viau tawh thrin a ni.

Hmai hnawihsen
Province hrang hrangah tih dan a inang vek lova, tin, awmna khua a zir te pawh a ni bawk. Kan province Shaanxi ah hian Moneitu nu leh pa leh Monu nu leh pa te hi an hmai an hawihsen sak thrin. Rawngsen hi vanneihna rawng a nih avangin hemi ni pawh hian hlimna leh lawmna entirnan an biang chu rawngsenin an thairan sak nuan thrin a ni.

Inneih thilpek
An tihdan ah chuan Hunserh hmanna hmunah hian thilpek lo dawngtur bik an ruat a, a ni chuan lehkhabu a inchhawp anga, chutah chuan an thilpek chu a lo chhinchhiah thrin ang. A tlangpuiin pawisa faiin thilpek hi an pe a, Envelope sen chhungah pawisa chu thun thrin a ni. Inlaichinna a zirin pek tam leh tam loh chu a innghat a, dan tlangpuiah chuan cheng 100 an thun thrin.

Hun khar dan
Mipui tan chuan chaw eikhamah kan haw darh mai thin a, nupa tuak tharten kawngkharah min thlah liam leh thrin a ni.

Nupa khum
Nupa khum hi puan senin an khuh a, chumi chungah chuan, badam te, khawkherh te, nihawichi te, chithlumte an dah a, hmanlai phei chuan naupang ho an chen tir thrin. Nupa tuak tharte hian chi an lo tlah pun zel theihnan a duhsakna leh beiseina a entir a ni.

Tlipna
Chainis inneih dan hi hmun hrang hrangah a inang lova, tin, Pathian ringtu an nih phei chuan an hnamze kalphung an zawm kher lo thrin. Puithunna thuah pawh thangtharte chuan an hmanlai dan an zawh kim kher lo bawk.

Keima tawnhriat chinah han ti ve khanglang ila, Inneihni hian program indawt dan hi pakhat mah hriatlawk kan nei lova, ka thrianpa ka zawh lah in “ka hre lo” a lo ti ve zel bawk a. Thil kalphung hre vak lo chuan kan tluan ve thrak tho a ni. A hlimawm phian!! Ka thrianpa hi ringtu a ni a, a thriannu erawh hi a la ni lova, tin, zu no dawm kual a dawhkan tlawh kualnaah hian zu tak tak hmang lovin tui kan hmang a, mahse Chainis pa hian an hre hrang khawp mai a, kan no dawm chu min dah tir a, an zu no dawm lai atang chuan min intir tawk te pawh an awm. Meizial hi thil pawimawh tak a ni bawk a dawnkan tinah engemaw zat chhawp thrin ngei ngei a ni. Badam te, Nihawichi te leh chithlum te hian chithlahna lampang a entir a, chuvangin hengte hi a serh zinga a mei ang an ni!

Inneihni a intih ruih hi a tum thrin a, hei hian hlimna leh hnianghnarna a entir bawk. Sap hovin ‘Bottoms up’ an tih hi Chainis chuan ‘gan bei’ (no hulin) an ti a, an in ‘ganbei’ nasa thei hle!!! Rui tak takin an hawng a mahse buaina siam emaw, a phunglung fal nih chu zahawmna bo ah an ngai thung ani.


forthalaientu@17/2/2010

Sunday, May 16, 2010

Nun Rimawi

(The Symphony of Life)

Kum 1999 atang khan Shaanxi Provincial Sorkar chuan Ramdangmi (foreigner) ram hmasawnna atana mi tangkaite hnenah “Sanqin Friendship Award” a pe chhuak thin a. He lawmman hi Shaanxi Provincial Sorkarin ramdangmite tana lawmman a siamah chuan a sang ber a ni. Kum 2008 atan mi 11 an thlang chhuak a chungte chu Russia ram mite, Korean te, Japanese te, German te an ni hlawm. Lawmman hlanna inkhawm hi ni 27.9.2008 zan ah Xi’an Conservatory of Music ah neih a ni a. Hetah hian kan University zirtirtute pawh sawm kan nih angin kan telve a. He lawman hlanna inkhawm zawh hian Orchestra concert an nei nghal bawk a chumi chhim ve thei a ka awm chu ka lawm hle a.

Orchestra concert ah hian rimawi lama mi thiam chungchuang tak tak ten rimawi chi hrang hrang an han tum a. Chinese musical instrument Erhu te, suona te leh sapram musical instrument chi hrang hrang Cello, clarinet, harp, viola, cymbal, drum, tambourine leh a dang te inchawhpawlh mawi tak maiin an han tum mai chu le… a va han rimawi ropui dangdai tak em. Suona solo leh Violin solo te, Opera zaithiam ten awki mawi sang dangdai tak maiin orchestra te nen an rem han ngaihthlak chuan rilru a ti kal thui duh khawp mai. Rimawi hian mihring a lo khawih nasat theih dan min ngaihtuah tir vang vang mai a ni. He mi zan pawh hian rimawi an han tum a, a changing zawi deuh ten, sang tak ten, muang deuh te, rang deuh ten an han tum kual kawi vel a, a ngaithlatute hmulthi ding ur ur khawpin min han awi chu.. khawvel a cheng kan ni tih min theihnghilh tir thei lek lek a ni. Puak thei nita ila min ching darh vek hial awm e tihtur khawpin thin lairil a fan thei a ni!!

Hetia mittui tla deuh tuau a rimawi thiam tak maia an han tum vel ka en lai a ka rilru lo lut chu hei hi a ni. Rimawi hmanraw (musical instrument) chi hrang hrangte hi a tumtu thiam tak kutah chuan mawi dangdai tak mai a ni a, a ngaithlatute tan dam sawng sawngna thlen thei khawp hialin hna a thawk thei. Rilru hah te tan rilru chhawk zangkhai thei, tapte tan nun hlimna pe theitu, beidawngte tan beiseina pe theitu a ni thin a ni. Nimahsela, chu rimawi hmanrua vek chu a tum thiamlo ten an khawih ve chuan midangte tan bengchhheng a ni. A bengchhen em a vangin thinrimna te, lungawilohna te, tahna te a tichhuak thei. Tichuan, ka ngaihtuah ta zel a, kei hi rimawi hmanhraw pakhat hi ni ta ila tu tum nge ka duh ang le ka ti a ka inzawt a. Keimah mai a ka awm a tum tu ka neih si loh chuan rimawi hmanrua ka nihna khan awmzia a nei dawn si lo.

Ka thenawmpa in Guitar min pe a, tum ka zir ang ka ti a, ka inkil khatah hian ka tung a. Mahse, tum tak tak a awm loh avangin ka inkilah a intung lai reng ringawt mai a. Chutiang deuh chuan guitar tumtu neih loh avanga lai reng mai ang khan tumtu mumal nei lo nun chu a lai reng mai dawn a, a ri a mawi thei dawn lo a ni tih min ngaihtuah chhuah tir a. Tumtu nei nun pawh a tumtu in a tum thiam loh chuan a ri a mawi thei lo. Min tumtu tur hi thlang thei dinhmunah ding ta ila tu tum nge ka duh ang le..Rimawi khawvelah chuan Beethovan a te, Mozart te,Handel te Chopin te Classical hla siam thiam lamah chuan mi ropui a tluk tur awm thei tawh lo anga ngaih hial tur an ni. Chuvangin an rimawi siamte miin an hlut em em a thangthar te pawhin an mahni hma lo sial kuakah rimawi an rawn siam chho ve zel mai a ni. Hetiang deuh hian, vawiin ni thleng a khawel a mi lar tawp hlei thei lo, a nunzia amah ringtu leh ringlotute pawhin an la zir reng mai, mitam takin a hming ringawt pawh an lo thihchilh tawh, amah ang tluka lar hi khawvel a lo piang tawh zingah hian an awm thei tawh lovang ti ila kan sawisual lovang chu! Amah chu Lal Isua hi a ni. Khawvel mihring lo piang tawh zingah chuan amah hi ka ngaihsan ber a ni a. chuvang chuan Ani hi ka nun tumtu ah chuan ka thlang ta ber mai a ni. Eng vang nge? A ni thluka nun kawngkal (rhythm/music of life) hria hi an awm theih ka ring lo. A ni tluka nun kawng chhuk chho hre bel hi an awm ka ring lova, a kalkhan pawh a hre ber in ka ring a. Ka nun hi rimawi ngaihthlak nuam taka a chhuah theih nan chuan Lal Isua’n a tum hian a mawi ber ka ring a, a lo ngaithlatu tan a ngaihthlak a nuam berin ka ring tlat a ni.

Lalhlupuii Sailo
forthalaientu@29/9/2008