Newsletter March 2008

MyUpdate 5-15 (March ‘08)

31^st March ’ 08

Rawngbawlpui duhtak te,

Ka chanchin rawn ziah te min lo chhiar sak thin a a hmasa in lawmthu ka han sawi duh a, Pathian hnathawh ka hmuhte kan han hrilh chhunzawm leh dawn che u a, dawh thei taka min lo chhiar sak leh turin ka han ngen a che u.

Chinese School kal: Chinese tawng duh anga thiam loh hi rawngbawl tak tak dawn chuan rokhawlhna min pe tu a ni fo thin a, chuvang chuan Pathian hnenah Chinese zir phurna ka dil thin. Class kal nen, naupang ho kilkawi nen, hunawl duh anga ka neih loh leh sum duh ang neih loh nen chhuanlam tamtak ka insiam chawp thin a, hun rei tak chu duh si in Chinese ka zir lova. Tichuan hetia ka in ngaihtuah lai hian China ram a Pathian rawng lo bawl hrep tawh Gladys Aylward chanchin film ka en a, chu chuan rinna a penchhuak turin min cho thar hle. Tichuan, tun thla tantir atang khan Chinese schoolah chuan ka va in ziak lut ve ta a ni. Kar tin darkar li ka kal a, ka hunawl neih apiang zir nan ka hmang bawk. Pathian hruaina in nuam ka ti ve hle mai a, amaherawh chu a har ka ti khawp mai.

Venus-i manganna: Nikum lama ka zirtir naupang pakhat Venus-i hi naupang fel tak leh an class ah chuan English thiam ber pawl a ni awm e. Ka zirtir hlui a nih mai bakah Free Talk ka buatsaih thin ah khan a rawn kal ve thin a. Tlema a class puite aia a saptawng a that deuh avang hian amahah hian beiseina neih rukna hi ka nei thin a. A chang chuan saptawnga kan ti ti hona ah Pathian chungchang te sawi vak chang te kan nei thin. Mahse hetiang hunah hian ka hmuh ruk dan chuan Pathian kan sawi hi tunge a nih hriatna a neih miah lo a ni tih hi ka hmu ru thin a. Tichuan, ka theih apiangin Pathian hnenah ka hlan thin.

Tlai khat ka inkhel bang hi, “Puii, ka nun ka ngaihtuah a ka hmalam hun tur ka ngaihtuah a ka rilru a buai hle mai” tih hi Venus-i chuan sms min rawn thawn a. Ka hah hle a mahse Pathian kawng hawn ngei niin ka hre si a. Tichuan, ka inah titina hun ka siam sak ta a. Ka theih ang angin a harsatna chi hrang hrang min hrilhte chu ka sawifiah pui a. Venus-i ang hi tam tak kan naupangte hi an ni hlawm a, an harsatna ber thin chu an hmalam hun an ngaihtuah a, kawng an bo em em thin, hei hian an nunah lungaihna chi hrang hrang a thlen thin. Mathaia 6:25-34 hmang khan engmah lungkham tur kan nih loh zia te ka sawifiah a. Lungkham ka neih chang pawh a he bung leh chang hmanga Pathian lam ka en vat thin thute hrilh in Pathian min hriatna avanga ka thlamuanna te ka hrilh ta teuh mai a. Hman atanga a tana ka tawngtaisak thin thute ka sawi chuan mak a ti em em mai a. Pathian Lehkhabu te ka pe a a rilru a hah apianga chhiar thin tur leh tanpuitu a mamawh apianga Isua hming lam thin turin ka thla ta a ni. Tunah hian Venus-I hi inhmuh lehna mumal kan nei leh tawh rih lo mahse Pathianin a nunah thu a sawi chhunzawm zel ka ring a, a nunah hian “Chi” tuhin a awm a ni tih ka hria a ka lawm hle.

Jack-a leh Heleni: Jack-a hi Jenis-i thawhna a an Computer zirtirtu a ni a, Jenis-i computer a siamsak thin a, Jenis’in ka computer a chhiatin min in hmel hriattir a tichuan ka computer a chhiat apianga min siamsaktu ber a ni ta a. Helen-i hi Jack a High School thian a ni a tunthlengin an la inkawm zel a, Jack a hian Heleni hi min inhmelhriattir a, kan inkawm ho ta dial dial a. Ni 14 tlai khan Helen-i hian chaweiah min sawm khawm a hun tha tak kan nei thei a. Thil chi hrang hrang kan sawi a, kan thianpa Jack a hian a harsatna a rawn sawi chhuak ta a. China ramah hian nula tlangval inngaihzawng te hi a tlangpuiin an thiante/chhungte inhmelhriattirna atanga in tan a ni fo a, hemi chungchanga a harsatna kan khel ta a. A tawpah chuan ka tawngtaisak ta a. Hetia ka tawngtai sak thin hi Pathian ringlotu ni mahse an thlamuanpui thei hle a, amaherawh chu an mahni hian Pathian mamawh an ni tih inhriatna tak tak hi an la nei hran lo. Heti chung hian kan tawngtaisak chuan min tawngtaisak ve ziah thin a ka rilru a khawih theih hle. Pathianin engtik niah emaw chuan an rilru a khawih beisei chungin ka thlir thin.

Easter Thuchah: Easter kar chho hi kan tan class rum ah Pathian thu tak tak kan sawi theihna hun a nih avangin kum danga kan tih angin kan hmang tangkai leh hle. Class tam zawkah chuan an ngaithla tha em em mai a. Hla pakhat “Lord I lift your name on High” tih ka zirtir chuan a tiphur hle mai bakah “Action” tela ka sak chu mak an ti em em mai bawk. An hotunu ber maiin Action Song sa a kan phar huang huang chu mak tih loh a har a niang an mobile phone an la chhuak a thla an la nuai nuai mai a ni. Ka rilru tak chuan ka zak ve lek lek a mahse ka tih tak em avangin ka naute ho pawhin nuih zat mai chi a nilovin an hre ve ngei in ka hria. Lal Isua ka tana zahna tawp a kaltlang avangin Lal Isua en chungin ka phar dawr dawr mai a ni.

Class 16 hi ka zirtir hoah chuan an harsa em em mai a. He classah hian Easter chanchin kan sawi dek dek chu naupang pakhat chuan “Kan awih lo” hi a rawn ti lal lal a. He class hi an harsat thin em avangin ka rilru hi an ti beidawng em em mai a. Mahse Lal Isua thihna leh Thawhlehna avanga ka nun tih danglama a awm thu te, mi thinchhia leh rilru sual ka nih thin zia mahse tih danglam ka lo nih dan te, tuna Puii an hriat leh hmana Lal Isua ringlo Puii danglam zia te kan sawi chuan an ngaithla tha em em mai a. Artui hi class tinah pakhat theuh ka keng a, a tawpah naupang in volunteer ka chei tir a ka pe thin a. Hetia easter chanchin ka sawi zawh chuan “kan awih lo” rawn ti tu ber kha artui chei tur chuan a rawn inpe chhuak a, Pathian in chawp leh chilhin a nun a khawih ngei niin ka hria. Hla ka zirtirte pawh a sa phur ber berah a tang ta a class ka chhuahsan chu ka rilru a lawm hle. Tin, hetiang ang harsatna karah hian class thenkhatah ka zirtirte zingah ringtute an rawn insawi chhuak liam liam a ka lawm hle.

Ankang lamah kan pawlte: Tun kum chu kan group Easter Retreat in kan khaw thenawm Ankangah kan zin hova. He kan zinnaah hian Good Friday atanga Easter thleng khan hun kan hmang hova, Pathian hruaina in nuam kan tiin kan hlawkpui ve hle. Kan thiante hnen atangin thuchah kan ngaithla in thlarau lamah pawh kan hlawk hle. Tin, intihhlimna hun tha tak kan nei thei bawk a, dil pakhat Ying Hu an tih chu a huhovin lawngin kan fang a nuam kan ti ve hle. Tin, a khaw mipuite mak kan tih khawpin an fel bawk a ni.

Free-talk malsawmna: Ka hunawla Chinese ka zir tak avangin duh angin Free-talk ah hun ka hman rei pui thei ta lova. Vanneih thlak takin ka thawhpui Ghana rama mi hi ringtu tha tak mai leh thahnemngai tak mai a ni a. He ka thianpa hian ka free-talk hi min tih pui thin a Nilaithawhtan chhun dar 12:30 atang 1:30 thleng hi ka awm a a nin a hnu lam hi a chhunzawm thin a. Ni 27 a kan free-talk ah chuan a zirlai pakhat Doris-i chuan ringtu te zinga inkhawm a tum thu hi a rawn sawi chhuak nawlh a. Eng vanga inkhawm duh nge a nih ka zawh chuan ti hian min chhang a, “hei aia thinlung mawi leh tha zawk hi neih ka duh a chuvang chuan inkhawm ka duh” tih hian. Ka rilru a khawih hle mai a, ringlo mite hian an thian ringtu te nunah nasa takin thil danglam an hmu a ni tih ka hriatin min cho thar hle. Tichuan, midang chuan engtinge Easter ka hman a engvangin nge ka nuna a pawimawh chhan te min zawt chhunzawm ta zel a, ka testimony te ka sawi phah thei a ka lawm hle. Heng ka naupang te hi tawngtainaah min han hriatpui ula ka duh hle mai. Mandy, Sally, Mary leh Doris an ni a, Doris-i nen hian thlatharah hian an khuaah kan zin dun dawn a Pathianin kan hun mal min sawm theih nan mi han tawngtaipui turin ka han ngen bawk che u a ni.

Beidawn hnuah Pathian che thin: Ka newsletter a chanchin ka rawn ziah thin Victoria-i kha in la hre hlawmin ka ring a. Kum 2004 atang khan kan in hre tawh mai pawh ni lovin Pathian thu lamah ka lo kaihruai tawh thin a. Ka beisei ang erawh chuan ka theih anga Pathian thu ka hrilh thin te hi a thla tha lo thei hle. Tin, keimah chauh lo pawhin foreigner te Chinese ringtu rawngbawltute pawhin an kaihruaiin Pathian thu zirpuina pawh an nei thin tih ka hria. A nunah Pathian duh tak takna nei lova ka hmuh avangin Pathian thu ka zirtir thin chu titawp turin ka rilru ka siamfel a. Tichuan, kan inhmuh hmasak berah regular taka ka hmuh theih tawh loh tur thu hrilh turin ka inbuatsaih a. Ni 28 Friday khan hun ka neih avangin ka inah lo kalah ka sawm a. A rawn thlen velah hian ti hian a ti a. “Puii zanin chu Pathian thu zir ka duh, a bikin Thuthlungthar, Isua chanchin hi chiang zawk a hriat ka duh min zirtir rawh” tih hi a sawi hmasak ber a ni a. Engvanga Isua chanchin zir duh thar ta thut nge a nih tih kan zawh chuan tihian a ti a, “engtikah emaw chuan C’tian ka ni ve mai thei a chuvang chuan Isua chanchin hi hriatchian ka duh a ni” a ti a. A hma chuan Pathian ringtu nih a C’tian nih duh si lo a ni thin. Tichuan, Isua Pathianna chungchang, a thilmak tih atang te khan ka zir pui ta a. Hetia kan han zir zo chu tihian a ti leh a, “Pui, I dawhtheihna avangin ka lawm takzet a ni, Chinese ringtute chu ka lakah hian an beidawng tawh a, mahse nang chu I beidawng lova ka lawm tak zet a ni. Tin, hun kha leh chen Pathian thu kan zir dun tawh zawng zawgah zanin hi ka rilru ka pek vawikhatna leh ka thinlung zawng zawnga ka zir vawikhatna a ni” ti hian a sawi ta a. Ka rilru hi lawmin a khat a, ka thinlung mittui hi a luang a ni. A laka ka beidawn tawh zia leh kha mi zan bak chu hmuh chhunzawm ka tum tawh lo rilruk te kha pakhatmah a hre si lova. Mahse Pathianin ka rin loh lam daihin hna a lo thawk a ni. A ropui ka ti a ka thlarau lawmin a khat a ni.

Pathian hian kei mitlinglo leh tawmkai lo hi min la hmang ve duh a ni tih ka hriat hian Pathian hi ka fak lo thei lo a ni. Kohhrante leh mimal min tawngtai sak thin te bang lova thahnemngai taka kan tan a hma in laknaah lawm thu ka sawi mawlh mawlh a ni. Pathian in ka tana chaw in ngeina te, sum leh pai ui lova in insenso thinna te, leh in suangtuahna leh hun hlu tak mai in sen thinnaah nasa takin malsawmin vur theuh che u rawh se.

Krista Isuaa Pathian chung lam koh chhan lawman hmu turin, tiam chin lam chu ka pan talh talh a ni. (Phil 3:14)

Pathian chauh a ropui ber nan,

Puii