Tuesday, March 13, 2007

Tawngtaipui tura ngenna

Rawngbawlpui duhtakte,

Kan Lalpa Isua Krista hmingin chibai ka buk a che u. Ka newsletter te min lo chhiar sakin kohhran ten min lo tawngtaipui reng thin a nih tih ka hriatin lawmthu ka han sawi hmasa e. Tin, in email hmuh te hi a thlamuan thlak hle thin a, min cho tu tha tak pawh ani. Tichuan tuntumah hian tawngtaipui in mi tawngtaisakna ka han dil duh che u a ni.

1. Pathian hruaina in Semester pawh kan tan leh ta a, holiday chhungin chawlh hahdamna hun thatak ka neih avangin class pawh tha takin ka neih phah thei in ka hria a ka lawm hle. Mi thenkhat chuan ka thawhna chanchin in hre nual tawhin ka ring a, han sawifiah nawn leh hlek a tha in ka hria a. Xi'an International Studies University a Vocational department ah ka thawk mek a. He dept hi English Subject chauh zirna a ni. Kan naupang te hi a tam zawk chu School pangngaia pass chhuak zo lo mahse an nu leh pa ten an awm mai mai tur ngai ngam lova kan dept a rawn dah te an ni hlawm. Hetih rual hian naupang thenkhat chu rilru nei taka English tangkaina hria a rawn kal hrim hrim pawh tam tak an awm. Hetiang a nih avang hian mi hausa fate tamtak an nih laiin rethei tak tak pawh an awm. Tichuan, thahnemngaih nachang hre lo va lo kal ve mai mai an tam avangin zirtir an har em em a, zirlai an ni tih hre lo ang mai a class a lokal ve mai mai pawh an tam hle. A chang chuan ka naupangte hi ka khawngaih thin, khawvela hian beiseina pawh hi an nei lo te hian ka hre thin. Tun semester hian vanneih thlak takin ka class thar min pe a, tlemin zirtir an nuam deuh hlek tawh a, amaherawh chu class pahnih khat hi harsa tih em em ka la nei a. Ka theih tawp ka chhuah ve in ka inhriat laiin ka naupang thenkhatte hian awm that duhloh an sim thei lo hian a chang chuan nasa takin min pawt hniam chang a awm thin. Helaia ka hnathawhna te hi min tih phur lo phah chang a awm fo thin. Inngaihtuah sual chang chuan haw nal nal mai te ka duh phah fo thin. Hemi chungchangah hian in mi tawngtaipuina ka han dil a ni.

2. Tun semester hian ka naupangte saptawng an tawng tak tak theihna turin "Free Talk" neih pui ve ka rilruk deuhva. Monday chawhnu dar 12:30 atanga 2:00 thleng hian office ah an tan bik hun siam turin ka rilru ka siam vel mek a. Hetianga naupangte kawmna hun ka neih hian Pathian zawng mek te hriatna hun leh belchianna hun tha tak ka neih ka beisei a. Tin, zirlaite harsatna te ka hriatphahin an tan tangkaina te ka neih mial ka beisei a ni. He ka ruahmanna hi ka tih puitlin ngei theih nan min lo tawngtaipui turin ka han ngen duh bawk che u a ni.

3. He ramah hian Pathian hruaina in a kum li na ka hmang chho ve mek a. Tichuan, tun dinhmunah hian thawhna te a la remchan zel chuan kum khat dang hi thawh zawm leh turin ka rilru ka siam a. Ka thawh zawm theih chuan July 2008 thleng awm leh rih tur ang ka ni. Ka hmalam hun ka ngaithuah a, ka inngaihtuah sual chang chuan "heti ringawta awm hi"....tih te a hnual sual chang te hi a awm thin. Pathianin ka hmalam hun a ka awmzel dan tur te min hmuh fiah tir a, Pathian ka ngah tang tang theih nan kohhran ho te in mi tawngtai sakna ka han dil bawk e.

4. Ka zirlai pakhat hi a nu leh pa an inthen tawh a, Mosolman hi a awm a. Tichuan chawlh lai khan SMSah Pathian a rin thu min hrilh a. Class kan tan veleh ka inah rawn lenna hun ka siam sak a. Pathian a rin chhan leh a rin duh chhante ka zawt a...Kan thawhna ah hian a ram mi ringtu tha deuh mai hi zirtirtu a awm a, chu pa chu an zirtirtu a ni a. He pa nun a hmuh hian a awt em em a, Pathian (Isua) rin a chak ve phah ta a. Tichuan, zirlai ve tho a thianten chawlhni hian an inkhawmnaah an hruai ve thin a. Amaherawh chu tunah hian Pathian a rin tak tak duh leh duh lo hi a chian loh thu min hrilh a. A chhan tam tak a lang chu, helai a ringtu te hian hetiang a an rilru a inhawng an hriat hian an tih ang zawng zawng ti ve nghal tur hian an beisei fo thin a, tamtak chuan an hnual phah fo thin a. Tunah hian a zawh loh thu te min hrilhin an rin tak tak duh leh duh loh a hriatchian loh thu te min hrilh a. Tichuan, Pathian Lehkhabu te pein chhiar dan turte leh tawngtai dante ka zirtirin, ka tawngtai sak tur thu te ka hrilh a. Tin, Mosolman a nih avang pawh hian a harsat zual thei viau dawn in ka hre bawk. Tin, nu leh pa tamtak hian sakhuana ngaihtuah hi mi rethei tihturahte an ngaih bakah naupangte zirlai tibuai thei thilah an ngaih bawk avangin chhungte hlauh vangin sakhuanna hi an ngaihtuah that ngam loh phah fo bawk. Nu leh pa hlauh vanga an nun tuihalna tih rehna tura Pathian zawn aiin thil dang thalo tak taka in hnamhnawih te pawh an awm chawk bawk. He mi avang hian he ka zirlai leh amah ang naupang tamtak te tan hian tangkaina ka neih theih nan min lo dilpui turin ka han ngen duh bawk a ni.

Tun tum atan chuan lo tawk phawt se.

In rawngbawlpui

Puii
10th March '07

3 comments:

  1. A tha e, tawngtainaah kan lo hrereng ang che u..keep it up..:)

    ReplyDelete
  2. Thank you for your thoughts!

    ReplyDelete
  3. kan lo tawngtaipui reng che ania, tkp fellowship leh inkhawmnaah te kan thawh thin che a, tuna detail zawka cc hriattheihna insiam ta hi atha ka tiin,tawngtaipuina tur atan atangkai khawp mai.

    ReplyDelete