Saturday, March 03, 2007

Newsletter

MyUpdate 2007_4/6-7

Rawngbawlpui duhtakte,

Kum 2007 tluang taka min hruai kaitu Pathian hmingin kumthar chibai ka han buk a che u. Helai rama ka hun hmante ka thlir letin min hruai thlengtu Pathian min awmpuina leh kaihhruaina te a ropui ka ti. Krismas vawi li lai mai Xi’anah ka hmang ve ta der mai. Hriat loh karin hun a lokal duak duak mai. Kum thum leh a chanve helaia ka awm chhung hian Pathianin thil ropui tak tak te min tihsak thin a ka lawm a ni. Ka sawi tawh thin angin helaia rawngbawl hi a chang chuan harsa ka ti bik thin amaw ni tih chang te ka nei thin a. Chak lo leh fel lo takin Pathianin min hruaina kawngah hian Amah rinchhan chungin ka kal ve tawk tawk thin a, heti chung hian min chelh reng thin a ni tih hi thinlungah hian min hriattir thin. Tin, helai ramah hian ka mal tan lova, in lamah a hrui lo pawt tang tang tu kohhran hote avangin tun dinhmun hi ka thleng a ni tih hi ka hrenawn fo thin.

School lam: Semester pawh tluang takin kan zo ve leh ta. Zirlaite pawhin tha takin January 18 khan exam te zo felin zirlaite pawh an Kumthar hmang turin an haw hlawm. Kan campusah hian naupang sang tamtak awm nuai nuai thin a nih avangin han chawlh meuh chuan a reh hle mai a, a khawhar thlak ve lek lek a ni.

Kan inhmuh leh hmazawng dam takin: Kan pawm chawp ramah hian Pathianin thian tha tak tak te kan hma ah a rawn hruai thin a. Ram hrang hrang atanga lokal te thawk ho te kan ni thin a. Tichuan, January leh February chho khan kan thawhpuite leh thian thenkhat te chu an ramah an haw nual a. He leiah hian inhmuh tawh kher lo mah ila van ramah inhmuh beiseiin in ngai tak chungin kan inthlah liam hlawm a ni.

Chun Jie (Spring Festival/Chinese New Year) Chawlh: Chinese Kum chhut danin kum tina an kut ropui ber Chun Jie an tih chu 18th February 07 kha a ni a. Hemi kut ropui tak avang hian 15th January atang khan 4th March thleng chawlh kan nei. Tichuan, he hun hi zin khawthawn nan mi tamtak ten remchangah an hmang laiin kei erawh chuan chawlh hahdam na hun tha tak atan ka hmang thei a ka lawm hle.

Suangtuahna Vakvel: Pathian rawngbawl ka ni chung hian ka rinchhan innghahna hi ka bel lovin Pathian mizia dik tak hi hriat loh ka ngah em a ka hriat avangin chawlh chhung hi Pathian Lehkhabu chhiar nan ka hmang ve thin a. Pathian in ngaituahna thar min pe ve nasa hle. Ka rilru kap tu leh tlangaupui ve ka chak te han tar lan ka duh a ni. Ka rilru a a awm hi fiah taka sawichhuah thiam harsa ka ti viau a mahse ka rilru a kap nasat em avangin ka thiam ang angina kan au chhuak ve dawn ange.

Engvangin nge Pathian pawi hi kan sawi fo thin le?
Kan naupan laia ka hriat reng thin chu inkawm ban mi reh lai hian kan thianzahoin mi huan thei hi kan lo ru thin a. Tum khat phei chu hetia kan lawh ruknaah hian a zar ka uai tliak a. Tichuan, a huan neitupa lah chuan ka tihtliah a ni tih hre miah lo hian a rah in a zar a uai tliak a a ti mai a, kan thianza hian kan nui ru tet tet thin……

Lal Saulate, Davidate, Solomonate kha Pathianin Isrealte lal atana Pathian mithlan te an ni. Pathianin an nunah ruahmanna lian tak neiin Isrealte dinchhuahna tur atan a hmanruaah chher a tum theuh a ni. Anmahni kaltlang hian thil ropui tak tak pawh a ti reng a. Nimahsela, Pathian duh loh zawng tiin Pathian lung an ti awi lo theuh a.

Saula khan Gilgalah Samuela nghak zo lovin ama thu in halral thil hlan a lo hlan ve ringawt mai a. Tin, Pathianin Amalek ho te that fai vek tur a thu a pek laiin, Amalek ho lal Agaga a nung chungin a man a, chubakah an ranvulh tha tha te a zuahin tha ni a a hriat angin Gilgalah halral thil hlanah hlan a tum ani. Pathian a lawm lo a ni. (I Samuel 13 & 15) Hemi avang Lal Saula lalna chu midang hnenah hlan a ni.

Lal Davidan Uriah nupui hmeltha tak mai Bethsebi chu a pasal indo a kal hlanin a lo mutpui a, a lo rai tak avangin a thiltih tenawm tak mai inthenfai nan Uriah chu indona tualah a thihna ngei tur hmunah hma a tawn tir a. A ruahhman ang ngeiin Uriah chu a thi ta ngei a. Pathian a lawm lo a ni. (II Samuela 11; 12: 11-14) Davida in a ruka a tih rek rek kha mawi lo takin ama chhungte ngeiin Israel fate mithmuhah mawi lo tak in an ti a ni.

Solomona Lal fing leh hausa khawvelah amah tluk awm lo khawpin Pathianin a chawiliana. Hmangaihna semzaiin hnam dang hmeichhia tam tak a nei a. “Anmahni pawl suh ula, anni pawhin pawl che u suh se: an pathiante lamah in thinlung an hruai kawi ngei dawn si a,” tih Pathian thupek kha a zawm duh lo lui a. Tichuan, sawi ang ngeiin Zidon ho pathiannu Astorethi leh Amon ho pathian tenawm tak Milkoma chu a zui mai bakah a nupui te pathian biakna theuh tur hmun sang te a siam sak a. Pathian a thin a rim a ni. (I Kings 11:6) Solomona lalna ram zau tak mai chu thiah darh vek a niin a hnuaia mite hnenah pek darh vek a ni.

Pathian pawi kan sawi dan ni a lang te:
Tun hnaia thusawi ka ngaihthlak ka rilru a cham zui veng veng chu hei hi a ni. Sual tih hi Credit card hman ang deuh a ni, sual tih hi a nuam a ni, kan pawm emaw pawm lo emaw a nuam a ni. Mi huan thei lawh ruk te pawh kha nuam kan ti thei lutuk, a hnu leh a a neitupa thusawi ngaihthlak chak te khan kan ti fo thin. Credit card pawh hman a nuam a pawisa pek ngai lovin thil a lei theih a, mahse rulh leh vek a ngai. Kan sual pawh hian hrem kan tawk fo thin. Kan huanah hian pear thei kung, rah tui deuh hi a awm thin a, mahse 1997 khan a tlu daih mai a ka ui em em a tun thleng a ka ngaihtuah hian ka ui a la reh thei lo. Mi huana thei kan lawh ruk thin vang kha a ni thei ang em le? Hemi vang a nih ang tih hi chu ka hre chiang lo.

Tichuan, hetiang hi a lo nih si chuan engvangin nge ka sual (Pathian duh loh zawng ni a lang zawng awng) leh thin le? Lal Saul ate, Davidate, Solomonate a tang hian han chhui dawn tai la:

1. Pathian nghak zo lova chet; a thutiam nghah chhuah zawh loh: Saulan Gilgalah Samuela a lo nghak a, nimahsela a beisei niah a lo thleng silo, mipuiin an thlandarh san vek bawk si. Tichuan, a mangang ta a Samuela nghak zo lovin ama thu in halral thilhlan a lo hlan ve ringawt mai. Pathian hriakthih Puithiam Samuelan ti tura a tih a zawm lo. (1 Samuel 10: 8). Pathianin duh loh zawng a ti a ni. Pathian nghak fan fan lova kan lo chet ve fo thin hi kan tan a pawi fo thin a ni.

2. Mahni tha tih chin chiah a Pathian thuzawm leh luhlulna: Saula kha Amelek ho ahmei apa, nu naute leh an ran te thleng a tiboral turin Pathianin thu a pe a. Nimahsela zawm lovin Amalek lal Agaga a nung chungin an hawn a, tin an ranvulh tha tha te Pathian hnawl vek tawh kha Amah Pathian hnena inthawi nana a that ringin an hawn bawk. Samuela’n Pathian hnena thu a dawn Saula a hrilh pawh khan “E, LALPA thu chu ka zawm a lawm…..,” tiin tan hmun a khuar tlat a, ama ngaih chuan Pathian thupek zawm kim vekah a inngai a ni. Pathian thupek te a zawm kim loh avangin Pathian in lal a nihna a hnawl sak ta a. Pathianin a hnawl thil te hi an hmelmawi vang te leh an itawm avang te a a that ringa kan pawm luih tawng tawng te hian kan dinhmun a pawt hniam thin a ni.

3. Kan hmuh duhzawng kan fimkhur loh hian thlemnaah min hruai lut thei: Lal Davida khan Bethsebi kha engtia rei nge a inbual lai kha a en ang le? Hmu zuai a kalsan leh mai chu a ni lo tih a chiang hle…hmeichhe satliah nilo hmeltha takleh itawm tak a nih hre hman khawpin a en rei a nih hmel. A thil hmuhah duhtawk mai lovin tunge a nih hriatchian tumin a chhiahhlawhte a la zawh fiahtir ta deuh deuh a. Awhna tha lo tak sualah lutin Pathian pawi lian tak a sawi phah a, Pathian hremna a tawrh phah ta a.

Hla siamtu pakhat chuan “Ka mit hmuh leh benga ka hriatte hian sualah min hruai lut” tiin a sawi a. Kan thil hmuh suala min hruai thei awm ang lang laka kan inven loh hian kan tan a pawi in kan chhiatna thleng min hnuklut thei a ni. Tunlai mi tamtak te tan chuan “pornography” te hi mit chakna, sual a min hruai lut thei entirna tha tak a ni awm e.

4. Pathian dik lo biak: “Keimah lo chu Pathian dang nei suh” tih hi Thusawmpekte zingah pakhatna a ni a, “Milem siamchawp be suh” tih hian a dawt leh a. Pathian hian enge duh kan tih chuan kan thinlung hi a duh a ni. Kan sum leh pai te leh thildangte hi chu a berah a duh an ni hran lo. Thuthlunghlui hun lai khan nupui tamtak neih kha thil pawi tak a ni hmel hran loh, amaherawh chu Milem siamchawp be hnam nula te khan thinlung an hruaikawih theih avanign nupui an neih kha Pathian duh loh zawng tak a niin a lang. Solomona kha khang hnamdang nula te kha a nei lui tlat a, a thinlungah Israelte Pathian aiin a nupui Pathiante khan hmun an luah thuk zawk avangin Pathian mithmuhah a tling zo ta lo a ni. A lalram chu thensawmin a awm phah ta a ni.

Engtinge sual lakah kan in ven theih ang le?
Engatinge Saulate, Davidate Solomonate hian heng thil pawi tak hi an tih tak le? An hriatloh vang em ni? An hriat loh vang ni dawn se, thusawmpekte leh dan te kha ziahthlak vek a ni lovem ni? Mihring an ni a, tisual thei an ni a lawm ti dawn ila, sual laka an in ven theih nan leh Pathian duhdan a a nun theih nan nundan tur (instruction manual) zirtirnabu te kha a siamsak vek si…

Tichuan, sual laka inveng tur hian enge pawimawh le …heng zawhna te hi ka zawt ta a….

- Pathian mizia hre chiang lo hian a thupek te kan palzam thin em ni le?

- Sual leh a ngawng pawi theite kan hriat chian loh vang hian kan pawngpaw ngam emaw ni chu aw?

- Nun dan dik kan hriat loh changte hian nunkawng dik min kawhhmuh thei tur (Pathian lekhabu) ringtute tan a kan “Instruction Manual” te hi kan bih ngun peih loh vang em ni ang le?

- Pathian duhdan a nun a tulna kan hriat chian loh vang em ni ang le?

Zawhna tur a tam hle mai, a tangkai ber leh a pawimawh ber pawh hriatsen a ni lo. Engvanga heng zawhna te hi nge zawt ka nih tih pawh hi khel fe tham a ni tih ka ngaihtuah chhuak a……Bo map thlengin heng thilte hi a khel theih dawn in ka hria a, ka buai thui hma in ka rilru ka siam a ngai tih ka ngaihtuah chhuak a.

Tichuan, heti hian ka ngaihtuah ta a. Heng lal ropui tak tak te hian Pathian duh loh zawng an tih avangin Pathian hremna an tawk theuhva, an malsawmna dawn tur tam tak an chanin midang hnenah hlan chhawn a ni bawk. Hrem ngaite chu hrem lovin a chhuah lo reng reng a ni tih heng late pathum atang hian a lang chiang a chubakah sual nih inhria a sim te chu a ngaidam bawk.

Pathian ringtu leh a mihriat ka nih angin keimah kaltlang hian Pathianin remruat tha tak a neiin, malsawmna tam tak ka tan hian a dah ang tih ka pawm a, hengte tihpuitlin a nih a Pathian ka lo chawimawi theihnan heng mite atang hian Pathian duhzawng ka zir fo leh ka in hrilhnawn fo hi a ngai a ni tih ka hria a. Tin, mahni hmasial takin ka malsawmna dawn turte hi ka chan lohnan zirtirna tha leh dik ka zawm theih nan Pathian mite ka rawn fo a ngai bawkin ka hria a. A pawimawh berah chuan Pathian hnaih a awm hi a tha a, Pathian hnaih tur chuan thinlung thianghlim taka tawngtai tam te, Pathian lehkhabu chhiar a a aw ngaihthlak tam hi thil pawimawh tak a niin ka hria. Heng zawng zawng tihtheihna hi Amahah bawk a awm si…“Kei Alpha leh Omega, a Hmasaber leh a Hnuhnung ber, a Bul leh a Tawp ka ni”(Rev 22:13) a ti si a.

A tawp berah chuan heng ka rilru a awm te hi ka thiam ang angin ka han au chhuah pui ve a, kan thurin kalhte a awmpalh ang tih te pawh ka hlau viau mai. Tawngtaina nen venpui chungin min lo chhiar sak a turin ka hang ngen nghal a che u.

Pathian ropui nan

Puii
2nd March 2006

3 comments:

  1. tha bon tawptop,abikin mahni hian tha tih chin hi kan ngah ltk in ka hria,pathian duhzawng lam care ai tak chuan keimahni tha tihna hian kan kaltam ltk ta nite hian ka hreve thin,lehlamah chuan mihring nih chhung chuan dawhtheihna te hi neih a har ve thin bok sia,i ziak tha khop mai.

    ReplyDelete
  2. hmmm.. nalh khups mai i blog chu..kan huan a thei bo thin te poh kha nagmahni thian ho hi in lo ni dawn thih ka hre chhuak ta..hehe

    ziak tha lutuk ringawt..khang Lal ropui tak tak te pawh-Pathianin ka thinglung ang pu mi atih te pawh sual ah an tlu a nih chuan..keini te phei hi chu ti raw..

    ''Sual'' a ka tluk ngun zia ka ngaihtuah hian a lawm,kan Pathian hi khawngaihna a khat Pathian hilo ni lo ta se chuan awww....

    kan sual te ang a min thung rul lo va,khawngaihna a min kuangkuah tu Lalpa chu fakin awm rawh se...

    ReplyDelete
  3. Saula anga mahni tihtur lo tih ching hi kan va'n tam em. Kan Zoram Kohran ngei te poh hian heihi kan natna vei a niin ka hria.

    Davida anga thilsual titam mahse inchhir silo hi kan tam lhe mai.

    Solomona anga fing si lova Materialism a pilbo mek Mizo te hi kan ni lo maw? Heibaka milem biakna hi a awm chuang dawn em ni le? Sum ngainatna hi sual tinreng bul chu a va han ni chiang em. Heta ta hi engtinnge kan chhuah tak ang le Mizo te hi??

    ReplyDelete