MyUpdate 5-17 (May ‘08)
5th June ‘08
A hmasa in kan aia thi a tho leh Isua hmingin chibai ka buk a che u. Min tawngtaipuina zawng zawng avangin lawm thu ka rawn sawi leh duh a, ka email thawn lo chhiar thin tute, fuihna thu min rawn thawn thin tute avangin lawmthu ka han sawi bawk e. May thla chhung a kan awmna ram a lirnghing avanga harsatna min tuarpuitute, mipui tana tawngtaisaktute leh thawktute tan a bang lova tawngtai thin tute zawng zawng chungah lawm thu ka han sawi bawk e. Thla kalta a ka thil tawn te kan han ziak leh dawn a, tlawmngai taka min lo chhiarsak leh turin ka han ngen leh a ni.
Racheli’n pasal nei ta
Racheli chungchang hi ka newsletter ah hian ka ziak tam vak lova. Ka University thawhna hmasa a Remrema zirtir thin a ni. Rema te inah Pathianthu zirin a kal ve thin a. Amaherawh chu hna avangin Shanghai lamah a awm ta a. Inkawm ho dial dial kan nih avangin kan thiantha ve tak pakhat a ni. Tichuan, May ni 3 khan hun engmaw chen a lo haul tawh Morgan a nen an innei ta a. Jenisi Aizawlah damlohna avanga a lo haw lai a nih a, tin, Rema leh Beii an awm bawk si lova, khawhar takin keimahin an inneihna ah ka va kal ve a.
Zing dar 9 velah Racheli te in ka thlengphei a, tichuan mo incheiin a lo inchei tawh a, mopa lokal hun nghakin a thian dangte nen a roomah kan awmkhawma. Dar 10 velah an in bulah halpuah a rawn puak tawk tawk a, tahchuan mopa a lokal a ni tih an sawi a. Ri kan hriat veleh Racheli leh a thiante ho nen a roomah kan inkalh khuma, tin an kawngkharpuite an kalh veka. Chuan Mopa leh a thiante chuan room an rawn kik dawt dawt a, kawng an hawng duh loh avangin “hong bao” (envelope sen a chhunga poisa awm) chuan inchhunga awmte chu an rawn tlawn a, envelope sen chu an rawn rawlh lut a. Tichuan, kan awmna pindanah pawh chutiang bawk chuan kawngkhar chu an rawn kik a. Mahse a thiante chuan “hongbao” an ngiat a, zai turin an ti bawk a. “Hongbao” pathum vel leh mopa a zai hnu chuan kawngkhar chu kan hawn sak a. Mopa chu pangpar mawi tak kengin monu chu a hmangaih a a neih duh thu a rawn hrilh a. Tin, hmeichhe pheikhawk hi thuruk a ni a, mopa hian a zawng hmu tur a ni. Tichuan monu pheikhawk sen an zawn hmuh hnu ah artui soup an siam sak hi an pahnih chuan an in tir a. Hemi zawh hian mopa chuan monu chu a pawm chhuak a, ‘elevator’ ah inpawm lutin ‘limousine’ dum sei tak maiah chuan a pawm lut a. (Chinese hnam danah chuan monu hi an in atang hian lei rap lovin mopa in a thleng tur a nia, mahse tunlai inneih ah chuan restaurantah an lawm tlangpui) Restaurant ah inneih lawmna chawei khawmna ah chuan kan kal phei ta a ni.
Chinese inneih hi restaurant ah chauh hian ka kal thin a, mahse Racheli te inneih a an inneih sawngbawl dan hmu thei a ka awm hi ka lawm hle.
Rukru ka um
May ni 4 chawlhni khan inkhawm banah inlam panin ka hawng phei a. Kan Uni gate ka thleng tep tih hian ka ipte a sir zawnga ka ah hi a che deuh hian ka hria a. Ka ngaihtha lo chu ka hawi vat pah chuan ka ipte chu ka khawih vat a. Chutia ka hawi rual chuan pa valai tak mai cher sang lampang hian ka ipte zen a lo tum lai tak hi ka va hmu fuh a. Tichuan, ka lungawilo chuan chupa chu “I van zak thei lo” tiin saptawng chuan hau mawlh mawlh a. Tichuan ka ipte a thil a la lo ni a ka hriat avang chuan kal leh mai turin ka rilru ka siam a. Mahse ka mobile phone hi a peng a dah a ka inhriat kha ka hmu ta lo tlat mai a. Tichuan, rukru pa chuan a la a nih ngei ringin um zai ka rel ta a. Ka Chainis thiam ang chuan chupa chu ka va um phei pah chuan “Ka mobile phone min pe rawh” tiin kan Uni bul kawngpui lun laiah chuan ka um phei ta a. Ani min hlau chu a tlan kei au phei pahin ka um bawk. Tichuan, kawngpui lianzawk kan thlen chuan ral lehlam min kai san ta a. Um zui zel a him lova ka hriat avangin lungai tak chuan ka let leh ta a. Tichuan, kan gate bula parking fee khawn putar leh a thiante pathum lo thu khawm, ka awmdan zawng zawng min hmu a, misual pawh min lo hrilhrutute chu ka va hau phei ta hrep a. “Chainis ho hi, hetiang ang harsatna ah hian inpuih in tum lova a tha lo, tanpui ngai vek kan ni. Mahse in inpui duh lo reng reng a a tha lo.” tiin ka hau hrep a. Ka rilru chuan “e he rukru chungchanga Chainis ho ka zilh theihna chance” ka ti ani. Tichuan, chutia ka tih hrep hnuah chuan ka rilru in ka mobile chu ka sun ta a, kum nga lai ka lo hman tawh a nih avangin ka rilu a na khawp mai a. Mahse Pathianin a thar lei a hun a ti a nih hi ka ti a, ka in thlamuana. Haw tura ka kal chiah hi ka mobile ka kekawr ipte a ka ah pawng hi ka zuk hmu a. Ka nuih hi a za hle mai a, kalkawngah keimahin ka nui phei vur vur ringawt.
Chaina ramah hian rukru te hi an in luling em em a, mipui mimir hian rukru thil ru lai an hmuh pawhin an inhrilh emaw an um ngai lo a ni. Mi tamtak chuan heng rukru ho hi pawl anga thawk ho ni a an hriat avangin an hlauva, chuvang chuan an en liam ringawt zel. Chuvangin hetia rukru ka um pawh hi thil him ber a ni lo a, mahse ka awmna lai kha a ual au em avangin ka ngam chauh a ni. Kan thiante tamtakin an pawisa ipte te leh an mobile te camera te an hlauh laiin Pathian hruainain engmah ka la hlauh lo erawh chu ka lawm hle.
512 Wenchhuan lirnghing
May ni 12 Wenchhuan chhiatna rapthlak tak mai kha kan hre theuh awm e. Mi tam takin nunna, in leh lo leh neih zawngzawng an chan a. Mi tam takin nu leh pa, fate, pi leh put e, tute an chan a Chaina ram mipuite thinlung a chhun a ni. Kha lirnghing avanga harsatna kan tawhte tlem ka rawn ziak tawh a, vawiin ni thleng hian lirnghing hlauh avanga puanin a zan la riak te kan khuaah pawh hmuh tur an la awm a ni. Kan department phei chuan ni ruk lai chawlh a puan phah a ni.
He ramah hian kum nga lai mai ka lo awm ve dawn ta a, hetiang ang reng reng a he ram mite sawi danglam thei thil hi ka awm chhung hian ka la tawng lo. Harsatna rapthlak tak mai a ni a, thite, an awmna chin hriatlohte mi tam tak a awm a, a buaipututen an nun an chan phah bawk. Hetiang ang vanduaina ni mahse ram dang mi mit atanga ka lo thlir danah chuan he harsatna karah hian thil lawmawm tak tak ka hmu in ka hria. Harsatna liantham an tawh chuan mipuite rilruah midangte tanpui duhna thinlung a lian em em a, tin, inpum khat em em mai a harsatna tuartute tanpui tura an pen dial dial han hmuh hi a ropui ka ti. Kan dept. ah te pawh vehbur an khawn a ka students te pawhin an pocket money an khawl a, ka beisei aia tam tanpui nan an pe hlawm a ni. Mi tam takin an hriatchhuah thar, lawmawm bera ka hriat chu, he khawvelah hian sum leh pai um a tlan vak vak hian awmzia a neih loh zia an hre chhuak thar. Sum leh paite in leh lo ro te hi minute khat lekah chan vek theih leh hloh vek theih a nih zia hrechhuak thar tam tak ka thiante zingah pawh an awm a. Tin, sum leh pai um aiin inlaichinna tha neih a hlutna an hmu chhuak thar. Ka zirtirte zingah ngei pawh ka naupang thenkhatte ngaituahna hmang tam deuhte chuan classmate te nena mahni hmasial lova inngeih taka awm a thatna an hmu chhuak thar hian nasa takin min fuih a ni. Tin, a pawimawh ber mai leh lawmawm berah chuan ka naute ho ngei pawhin mihring chakna te hian min chhanhim lohzia leh Pathian chauhva innghah hlutna an hmu chhuak thar nasa hle a, hei hi ka lawmna ber a ni. Lirnghing avanga harsatna hian rei tak he ram hi a nghawng dawn a chuvang chuan tawngtainaah bang lova kan tawngtaipui chhunzawm zel a hlu hle.
Gladys Aylward-i in ka hmu ta!
May ni 23 - 24 khan ka thenawnnu leh a thiannu leh ka thawhpui Simona nen kan thawhna rama kum 1930 vela lo thawk thin Gladys I in tlawhin kan zin chhuak a. He nu chanchin hi tlem ka mail hmasaah te ka rawn ziak tawh. Japan nena he ram an indo laia naupang za rual Xi’an a tlang chhengchhe tak kara him taka hruai thlengtu kha a ni. Kan thenawm hmar lam province Yangcheng an tih khua ah khawsa thin a ni a. He khua hi kan awmna atangin bus kal a awm loh avangin a thenawm khuaah zan kan riak a. A tuk ni 24 khan taxi in Gladys I in en turin darkar 3 vel kan in khalh leh a. Tin, hmun lar tak a nih lem loh avangin a khua kan thlen pawhin kan zawng rei hle. Ka rilru a beidawng lek lek tawh tiin pa pakhat hian a lo hre hlauh mai a, chupa zarah chuan kan zawng hmu ta a ni. Pathian min hruaina ngei niin kan hria a ropui kan ti. Gladys I in hluiah chuan tumah an awm lova, a inkalh thap mai a. Mahse a thenawmah erawh chuan cheng a awm nual. Hmanlai Chainis in dik tak kha a la ni a, a nih ngai ngaiin a la awm niawm tak ani.
Hetiang hmu thei a ka awm hi ka lawm a, nasa takin Gladys I nun hian ka nunah thu a sawi avangin vanneih thlak ka ti. Ka ngaithuahna a kalsual changin Gladys I nun hi ka ngaihtuah vat a min fuih thar thin.
Pathian chauh a ropui nan
In rawngbawlpui
Puii
No comments:
Post a Comment