Newsletter June 2008

MyUpdate 5-18 (June ‘08)
30th July ‘08

Pathian hruaina leh awmpuina in 2007-2008 semester chu tluang takin kan lo zo leh ta reng mai. Pathian min hruaina a ropui a, kohhran hote min tawngtaipuina ah leh min hriatrengnaah lawmthu ka han sawi leh e. Pathian min hruaina hi a ropui ka ti thin a, nitin hian thilmak hi ka hmu reng mai hian ka hre thin. Haw tura ka inbuatsaih rilruk tan avangin nghet lutuk lovin ka hun ka hmang a mahse he ti chung hian ka rawngbawlna kawngah malsawmna ka dawn hi ka chhiar seng lo a ni ber mai e.

Mite duhsakna dawng: January thla chawhnu lampang khan ka nau Kareni leh a unauten ka thiante nen park a lengah min sawm a. Nuam ti takin vur ten kan indo vel a. Tichuan hun a lokal zela ka nau pakhat Karen-I chuan a unauten kan bula awm nuam an tih thu leh hun remchangah min len chhuah pui an duh thu min hrilh a. Tichuan, June ni 7 kha kan hman ni awmchhun a nih avangin inhmu turin hun kan siama. Zing lamah ka thianpa nen kan bazaar a, mahse kan vahvelnaah chuan kan tluang lo angreng lutuk a lunghnur deuh hian ka haw a. Mahse ka rilruah “chawhnu lamah hian thil tha deuh a thleng dawn anga setana hian lungawilohna min siamsak a tum a niang” tiin ka inhnem a. Tichuan kan bazaar haw veleh ka nauten min lo nghah reng tawh avangin hmanhmawh takin ka naute min nghahna lamah chuan kan phei a. Ka beisei lo tak maiin Car tha zel mai hian min lo nghak a, chu mai bakah zin mite tlawh thin (Tourist Spot) tha tak mai kan kal chak em em hmunah min hruai tur thu min hrilh a kan lawm em em mai a. Tichuan, nuam ti deuhvin lui dung te kan zawh a, tuikhawhthla te kan en a, sakawr chungah te min chuan pui a. Heng hmuna kan luhna man hi a tam hle a mahse pakhatmah kan chawi a phal si lo. Lawm deuhvin nuam ti takin kan hun kan hmang chawhnu thak a. Tin ka nau unuate hian saptawng an tawng theilova, “Thank you” tih vel te hi chu an sawi ve thei. Chutiang ang chuan Chinese thiam chhun chhun hmangin kan inkawm ve a. Pathian hian min duhsak tak tak tu ringlo tu ni si te hi min pe thin a, kan phu vang pawh nilovin a hmangaihna leh kan hrehawm a phal loh zia a lantirna a ni tih ka thinlungah min hriatnawn tir thin.

Pathian nena nung tura duhthlang: Ka mail hmasa ah chuan tawitein he chanchin hi ka rawn sawi tawh a mahse chipchiar zawkin han tarlan ka duh a. Hetia ka naute nen kan leng kan haw hnu lawk hian ka nau Livia’in min rawn bia a. Tah chuan a thiante’n Pathian hnena an nun hlanve an duh a chu chu ka huaihawt theih leh theih loh thu min rawn zawt a. Tichuan a tuk chawlhni a inhmu khawm turin ruahhmanna kan siam ta a. Mahse a tukah chuan an mahni kohhhranah chuan a lo inkhawmpui a tah chuan an hotuten Pathianthute hrilhin inhlanna te an lo neih pui a. Tlai lamah chaweiah ka sawm ta thung a. Kan chaw ei khamah chuan ka inah kan haw leh dial a, engvanga Pathian kan nun a thlang nge kan nih thu te kan sawi hova nuam ti takin kan hun kan hmang ta a.

Inhlan ho zinga pakhat Amelia-i chuan heti hian a chanchin a sawi a. “College te kan kal a, thiante nen nun ho tak in kan khawsa thin a. Hunawl kan neihin KTV (Karaoke Tv) ah te, Clubah te kan hun kan hmang thin a. Kan awmho lai chuan nuam titakin kan awm a mahse hostel dormitory ah kan hawng a, a hranga kan han awm chiah hian ka nun hi a ruak ngawih ngawih thin a. Ka hlimna chuan a daih rei lo thei em em a, tin, nun awmzia hi enge ka hre lo a ni. Chutia ka ngaihtuah chang chuan ka hlim thei lo va ka ngui thin hle mai a. Mahse ka thiannu Livia-i nun hi ka en a, a nun hi a nawm hmel ka ti em em a, kan kum te a inanga kan khawvel chenna pawh a inang reng a mahse a nun a hlim em em mai chu ka awt thin a. Tichuan a nun chanchin ka zawt thin a. Ani chuan Pathian a rin thu leh a nun chu Pathianah a hlan tawh thu min hrilh a. Tin, inkhawnnaah te min hruai ve thin a. Biakina mite nun ka hmuhin hmangaihna a khat an niin ka hria a, kan society ah chuan khatiang an mi kha ka hmu ngai lo. Inhmangaih tak maia an inkawm dial dial ka hmuh te khan ka nun a khawih em em mai a. Tichuan, ringtu nih ka duh ve ta a, Pathian hnenah ka nun ka hlan ve ta a ni” tiin a chanchin hi a sawi a.

An thiannu pakhat Yolanda ti a a hming kan phuahsak chuan a chanchin ti hian a sawi ve thung a. “Graduate ka pass hnuin ka nu leh pa min rawn angin Continuing Education Department (Private a saptawng zirna department bik) ah hian ka kal tha leh a. Mahse college ka rawn kal a thian pakhat mah ka nei lova. Shaanxi province mi ka nih loh avangin ka klass pui ten min kawm duh si lova, mal takin ka awm thin a. Klass ka kal pawhin tumah ka be ngai lova, miin min biak pawh ka duh ngai lova. Klassroom chhungah pawh kan zirtirtuten min hmuh hlauvin a hnung berah ka thu a tumah be lovin ka haw leh tawp thin. Ka nun hi a beidawng em em thin a ni. Thian tha deuh mai Elaine-i ka nei a kan room a inan loh avangin an roomah hian ka awm reng thin a. Tlai khat chu keima roommate pakhat hian a mobile phone a ti bo va, ka haw tlai ber avangin ka ruk ah min puh ta a, ka ru si lova, mahse ka insawithiam ve dawn pawhin an awih si lova. Tichuan rilru na tak leh rilru hrehawm taka ka awm lai chuan ka thiannu thian Livia-i te nen hian kan inhmelhriat ta a Pathianthu min hrilh thin a. Chuta tang chuan ka khawvel thlir dan a lo danglam hret hret a, keima khawvel a ka tang a tumah pawh pawh duh lova ka awm kha ka lo danglam ta hret hret a, midang te biak duhna te kawm duhna te ka lo nei chho ve leh ta a ni. Tichuan, tunah kan thiante nun hi ka en a Pathian nen a nung a, an danglam bik tih ka hmuh hian Pathian thuawih ve ka duh a ka nun ka hlan ve ta a ni” a ti a.

Contract thar leh Visa thar siam: Kum 2008-2009 session atan Pathian hruainain tluang takin ka thawhna ngaiah contract tluang takin ka sign leh thei a ka lawm hle. Tin, visa hi contract nei lo chuan sign a theih loh avangin kan hotuten contract ka sign hnuah kum khat dang atan min siam sak leh a. Harsatna awm lova fel taka ka visa pawh tihfel a nih avangin ka lawm hle.

Ka nau ka tlawh kawng: Ka nau Livia’in saprama lehkha zirzawm a duh avangin amah thlah pah nan tiin an khuaah kal turin ka rilru ka siam a. Ni 30 zan khan relah ka nau leh kei leh kan thianpa nen relah an khaw lam panin kan chuang ta a. Zan dar 9 ah kan kal tan a, zan dar 10 velah chuan ka nau Mama’n min rawn phone a. Ka nu leh ka pa Bike a inkhawm tura an inphur chu taxi in a sut thu min rawn hrilh a. Ka thinlungah chuan “an pahnihin an thi” a rawn tih ring hian ka lo inbuatsaih a. Mahse a han sawi zel chuan, ka nu a na deuh hlek a ka pa erawh chu him pialin a chhuah thu a rawn sawi a. Ka rilruin Pathian hnenah lawmthu ka sawi mawlh mawlh a. Pathianin an nunna a zuah avangin lawmthu ka sawi a ni. Ka nu leh pa harsatna tawhah hian ka nu hian a zangruhte a sawh tawmin a dar ruh te a sawh khik avangin khumah thla khat tal mu turin doctorin a rawn a. Amaherawh chu ka nu vanneih zia hi kan sawi cham chi a ni. Doctorten tun aia a sawh nat chuan zeng tur a nih thu te an sawi a. Mahse zeng lova a awm avangin Pathian hnenah lawm thu kan sawi a ni.

Tichuan, rilru thlamuang takin, Pathianin a enkawl ang tih rilru pu in ka naute khua pawh ka tlawh theih phah ta a ni.

Lawmthu
A changa harsa ti tak chunga ka theih anga rawng ka bawl ve thinna ah hian Pathian hian a hnathawh nasa tak min hmuh tir thin a. A bik takin ka nau pakhat kaltlanga mi pathumin Pathiana an nun an hlan thar hian min cho tharin Pathian tan tankaina nei va inhriatna min neih tir. Tling lo taka rawng kan bawlna te mal a sawm hmuh hian, Pathian rorelnaah hian thu kan neih loh zia leh keini tih nilovin rawngbawlna hun remchang min siamsak mai zawk a nih zia hi a chiang thar thin hle in ka hria. Kohhrante nen a rawng kan bawl hona zar a nih zia pawh ka hre nawn fo thin.

In mi hriatreng thinnaah lawmthu sawi chungin,

Pathian ropui nan,
Puii