Rinna Ke Chheh_1/2012
(Thian thenkhatten ka
chhoh leh dan an hriat loh avangin a tlangpui a han tarlan ka duh a, ka
newsletter pangngai ang chiah pawh nilovin ka kalkawng tlangpui ka han tarlang
a ni e.A sei deuh a nih pawhin tlawmngaia min lo chhiar sak turin ka han ngen a
che u)
Pathian min hruaina
kawng hi a chang chuan a bumboh ka ti ve hle thin a. Tun tum a Chaina ram min
hruai thlen danah pawh hi awlai lo hle. Pathian hian Rinna a kal tur hian min
duh a, ka rin zawh loh ni hi a tam hle in ka hria. Mahse Amah ringa ka kalnaah
hian min thlahthlam ngai lova, vawiin ni thleng a ka nuna a thil tih zawng
zawngte ka ngaihtuah hian Amah ka rinna chauh vang a ni in ka hria a. Chuvangin
ka Newsletter hmingah hian “Rinna Ke Chheh” (Faith Walk/Faith Step) tih hi a
inhmeh riau in ka hria a, kan han fuah ve ngawt a ni.
Kum ruk dawn lai
mai Chaina ram kal tura ka rilru a inbuatsaih hnu in, kum 2003 August 29 khan a
vawi khatna atan Pathianin Chaina ram min dai tir ve a. Tichuan, University ah
Saptawng zirtirin ka thawk ve a. Ka subject hi M.Sc Geology a nih avangin a
chang chuan English zirtirtu a han thawh chu in sit a na thei hle. Mahse
Pathian in mualpho lovin min hruai a, kum sarih chhung mai zirtirtu hna thawka
ka awm hnu in kum 2010 August 29 khan, engemaw chen china ram rawn chhuahsan
turin India ram ka rawn rap leh ta a ni.
China ram a kum
sarih a hminga ka awm chhung hian harsatna pawh ka tawk ve thin a, mahse ringtu
tam tak te tawh ang taksa a tihduhdahna tawrh lam ni lovin, rilru leh
ngaihtuahna lama min ti hnual thei an ni fo thin a ni. Chung harsatna karah
chuan Pathianin mimal ang leh chhungkua ang pawhin min hruai chhuak, tap tlawk
tlawk chunga amah kan belhna ti thlawn lovin vawiin ni hi min thlen a ni.
China ram a kum li
ka awm hnu khan, mumal deuhva Chainis tawng zir duhna ka neih avangin, kan
University bula Tawng Zirna Schoolah ka in ziak lut ve a. Kar khatah darkar
thum class ka kal thin. Hetia han zir takah chuan hnathawk pah ni nilova,
tawngzir tawp hi ka duh thei hle a mahse ka dinhmun, sum leh pai ten a tlin si
lova. Tichuan, Pathian hnenah ka rilru in ka dil thin a ni. China ram a kum nga
vel ka awm atang khan ka rilru hi a beidawn chang hi a tam hle a chu chuan ka
rawngbawlna ah pawh a chang chuan min ti thuanawp lek lek thin. Pathian hnenah
“Lalpa, in tuaithar ka duh, India rama hawn a, vision thar nen a China ram hi
luh leh ka duh a ni,” tih hi ka tawngtaina a ni thin a. Chutianga ka tawngtai
fan fan hnuah, kum sarih hnu ah chuan ka hawna tur kawng a hawng ta a.
Pathianin hun a tih hunah chuan ka hnathawhna lamah pawh thawh chhunzawm chak
lohna tur thil a lo awm ve zel mai a. Tichuan, Pathian rawngbawlna kawnga
min hruaizelna beiseina nen India ramah engemaw chen awmturin ka hawng ta a.
Kohhran hoten duhsak takin, ka awm chhung HATIM College ah min dah a. Tangkaina
nei tam lo hle mah ila Pathianin min dahna hmun a ni tih ka hria a ka lawm hle.
HATIM College a ka thawh chhungin Pathianthu leh Conversational English ka
zirtir a, tin, Hostelah Warden in ka awm bawk a ni. Pathian min hruainaah ka
lawm hle.
Chaina ram ka
chhuahsan khan Tawng zira luh leh duhna nen ka chhuahsan a. Hnamdang zingah
rawng kan bawl a, tawng duh ang thal a thiam lova rawngbawl chu an rilru
chhungril khawih a thusawi a har em a. Pathianin rem a tih phei chuan Chainis
ringtute Mizoram kohhan hote zinga han hruaite ka chak em em a. Chutiang rilru
ka neih avangin India rama ka awm chhung hian hruaitute hnenah Chainis tawng ka
zir duh chhan, thuk zawka rawngbawl ka duh vang a nih te sawiin, ka vision te
ka hrilh a, budget te ka insiam a. Kum khata ka mamawh awm vel, ka khawsak
theihna tur ni a ka hriat kan chhut khan India pawisa Cheng 525000/-vel a ni a;
chumi budget chu kohhranah ka thehlut a. Tichuan, Hruaitute pawhin committee
hrang hrangah ka chungchang an rel a; committee hrang hrang a kaltlang hnuah
Chainis tawng zir tura min chawm chu harsa an tih deuh tak avangin kohhran
chuan an theih loh thu min hrilh a.
Chaina ram ka
chhuahsan hma atang tawh khan, Pathian hnena ka inhlanna chu, “Lalpa kohhranah
hian Chawm ka dil anga, an thei lo a nih chuan Nangmah rinchhana pen
chhuak turin min duh ah ka ngai ang a, a tul a nih chuan kohhran a misonari ka
nihna hi ka bang mai ang,” tih hi ka tawngtaina a ni thin a. Chutia hruaitu
committee in rem an lo tih loh takah chuan Pathianin Amah chauh ringa chhuak
turah min ngai niin ka hria a. Hetianga ka chungthu rel a lo nih takah chuan,
ka kawng zawh tur chu a chiang ta tih ka hria a, Amah ring a kal tur chuan ka
inbuatsaih ta a. Chaina ramah Tawng Zirna College ah admission ka buaipui nghal
a, awlsam takin an ni chuan admission min rawn pe a. Hruaitute hnenah ka
inbuatsaih chhung chu min hrethiam turin ka ngen a, an ni pawhin ka
inbuatsaihnan hun thawl min pe a. Ka admission te, visa te a fel vek hnu ah
February 25, 2012 khan India ram chhuahsanin Chaina ram chu tawng zir turin ka
rap leh ta a ni.
Hetia Pathian
rinchhan chauhva kal tura han in buatsaih taka chuan, a chang chuan ‘a’ te ka
in ti thin. Ka hlauh ber chu retheih hi a ni fo thin, mahse ka hna atangin kan
bang a kal tura kan han inbuatsaih takah chuan mite thinlungah Pathianin hna a
thawk a, sum leh pai ka mamawh a Sing tela ka rawngbawlna atana min paitu te
min han pe nawk chu hnuk hi a ulh lo thei lo a ni. Ka thianpa, pakhatin ka
thiltum ka hrilh atangin pawisa min lo khawl sak tang tang a, cheng Nuai chuang
a lo tling khawm bawk a. Mak ka tiin Pathian hian ka thiltum hi min pawmpui ve
ngei niin ka hria a ni.
Ka thleng chhova
Pathianin min buaipuitu tur min pe a, inluahtur te min pe a. Semester khat atan
ka fee ka pe a, thlaruk atan ka inluahman pek tur sum leh pai min pe bawk a. A
chang chuan hlauhna te hian min rawn bual leh thin, mahse hlauhna hi Pathian
Rinlohna a ni tih pawh min hriatchhuah tir bawk thin. Chutianga ka kal thlek
reng lai chuan Pathianin min enkawlna min hriatnawn tir nan, ka thian thenkhat
ten thlatin ka rawngbawlna atan sum min rawn thawn tur thu min han hrilh leh
a….Ka nghei ang tih ka hlauh em em laiin Pathianin min chawmtu tur min pe thin
te hi Amah bel ngawihngawih tur ka nih zia min hriatnawn tir thin.
Tawng zirna lamah
pawh Pathianin min hruai a, kan pawl hi an tam deuh avangin A leh B ah kan
inthen a, Class 2A (a thiam pawl :)) ah min dah ve anih chu!! Ka pawlpuite pawh
Russian te, American te, Irish te, Korean te, Kazakhstan, Kirgizstan,
Tajikistan tih vel ram atanga lokal te an ni hlawm. A tam zawk hi
chu semester khat lo zir tawh te an ni hlawm. Nitin zing dar 8-12 class kan kal
thin a, homework kan ngah ve thei khawp mai a, tin, chinese character hi ziah
reng loh chuan theihnghilh a awl em em a, hunawl chu chutiang tih nan chuan kan
hmang deuh ber.
Tawngtaipuina tur:
1. Fees
ka pek leh hun atan semester hnih daih pawisa ka neih theih nan: semester khat te
te a pek chu visa siam man a to si a, kumkhatah vawi hnih visa tih nun a ngai
zel a, semester hnih man fees pek hian visa kumkhat min pek theih ka ring a (ka
la zawt fiah lo) chumi atan chuan Pathian hnenah ka mamawh min lo dilpui turin
ka han ngen a che u.
2. Tawng
han zir takah chuan a har ve hle a, rilru zawng zawnga ka zirnaah ka inpek
theih nan. Rilru la peng thei thil a tama, ngaihpawimawh hmasak tur hmaih palh
a awl bawk.
3. Pathian
vanga awm ka ni tih ka hriatreng theih nan, min ti hnual thei thil lakah
Pathianin ka rilru min ven sak reng ka mamawh.
4. Mahni
tawn theuhvah hian kan kawng theuh hi a har a, mahse ka kawng hi har tih bik
riau chang ka nei thin, hetiang rilru karah hian Pathianin ka tan a thil
ruahhman hi ka hmuh thiam theih nan leh Pathian chauh ka beiseina a nih fo
theih nan.
In rawngbawlpui
Puii
3/4/2012
No comments:
Post a Comment