Newsletter Dec

MyUpdate 5_13 (Dec ‘07)
12 Jan ‘08

Rawngbawlpui duhtak te,

Ringtu te tana thla pawimawh tak mai kan lo hmang zo leh ta. He thla pawimawh tak hi keini helaia rawngbawltu te pawhin kan theih ang tangkaia hman tuma kan lo inbuatsaihna te kan ti hlawhtling thei a. Pathian min hruainaah lawmthu sawina tur ka ngah hle mai. December thla a Pathian hruaina ka dawn te han tarlan leh kan tum dawn a ni.

Thiante duhsakna
Tun kum ka birthday chu school lamah ka buaiber ni a nih avangin ka lawmthei lova. Amaherawh chu ka thenawmte min duhsak tak tak tu ka nei ve leh thin. Ka thenawmten ka birthday lawmnan Japanese restaurant ah min hruai a,nidang a ka ei phak loh te ka ei phah ve a ka lawm hle. Tin, ‘bekang’ an lo nei ve a Mizoram min ti hre chhuak veng veng. Hetiang anga min duhsak tute Pathianin min pe thin hi ka lawm hle.

Krismas chawei khawm chhawng
Tun kum Krismas chu chawei khawm chhawng hnih in ka buatsaih a. A chhawngkhatna a tan 8 December khan ka thiante Jack-a leh a thiannu Helen leh Jenis-i te nen kan pali in ka inah chaw ei khawmna kan nei a. Kan thianpa Jack-a hi kan computer a chhiat apianga kan koh thin, buai leh buai loh pawh sawi lova kan mamawh hun apiang a min pui thin a ni a, nasa takin kan tangkai pui a ni. Krismas Thing te kan chei hova, kan phak tawk a nuamin kan hmang ve a. Tin, Krismas awmzia pawh tlemte kan sawi thei.

A chhawng hnihna atan ka naute Pathianthu kar tina ka zirtir thin te leh a fala ka kawm thinte, 16 December khan a huhovin chaw eiah ka sawm khawm veleh thung. Tuntum chu kum dang ang lovin an eirawngbawl ka ei ve thung. A mal te te in an chawhmeh siam thiam an thawh khawm theuhva chu chu kan ei hova nuam kan ti ve hle.

December thla hi school calendarah chuan kan buai lai ber a ni awm e. School a department hrang hrangten Christmas program te an siam ve thin a. Tin, exam neuh neuh tam thla a nih bawk avangin ka naute nen hian duh angin hun kan hmang tha thei lova pawi ka ti hle. Chawei kham velah class lamah an kal leh dial a ngai a duh ang pawhin kan ti ti hman lova pawi ka ti hle.

Yangze lui dung lamah
Tun kum chu kan Waiban (Foreign Affairs Department) ten Yangze lui dung fang a zin theihna min siam sak a. He lui dung hi khawvel a tuikhuah lianber China sorkar in a siamna hmun kha a ni a. He tuikhuah hian mithiamte inkarah inhnialna a chawkchhuak nasa hle. University in kan kal man chanve dawn lai an tum avangin he hun hi bawhpelh loh hram ka duh ve sia. Tichuan, 20 December tlaiah Xi’an chhuahsanin Chongqing khawpui kan thlawkthla a. Hemi zan atang hian lawngah 24 December thleng khan Yangze luidung kan zawh thla ta a, tuikhuah lian an siamna hmun Yichang an tih khawpui thleng chu kan chuang ta a ni.

Yangze lui dung ka zawh hi China ram a ka zin tawhna ah chuan ka rilru khawih pawl tak ani awm e. Ram changkanna (development) avanga mi rethei zawk ten an tawrh nasat zia lui dung tluanin ka hmu thla a, ka rilru a khawih hle. Khaw pakhatah phei chuan zanah Hall pakhatah show an lo nei a, chu an showah chuan sorkar in an khua mipui nuai ruk lai mai a suan laia an rilru nat zia chungchang hi an lo chang a, mittui tla zawih zawihin kan en hlawm a ni. Kan hotupa min hruaitu ber pawhin nidangah chuan thilawmzia min hrilh fiah zung zung thin a, mahse kha mi tum kha chuan ngawirengin kan en thap hlawm a, kan mittui kan hru fap fap hlawm a ni.

Tun tum ka zin hi China sawrkar thiltihtheih zia pawh engemaw chen chu ka hmuh phah in ka hria. Hmun tam takah chuan Thingtlang khua tuiin a chim pil mek te, tuikhuah an zawh hunah phei chuan tui chhunga awm tur khaw tamtak kan hmu a ni. Tin, temple tamtak luidunga awm te pawh sawrkarin hmun sangzawkah a sawn chho mek a, amaherawh chu nasa takin an hlutna an hloh a hriatna kei chuan ka nei a ni. Khaw pakhat kan tlawhah chuan temple kan tlawh a, chu mi hnu ah chuan Dragon Boat race (Lawng inkar siakna) te a huhovin min neih pui a, nuam kan ti hlawm khawp mai.

Kurung mawi tak tak te kan kaltlang a, amaherawh chu tuikhuah an siam hnuah tui hi metre 100 ai maha tam a a than san tawh avangin a nihna dik tak a hlauh nasa tawh hle. Khawvela a “ber” nih duh reng reng a buai ram an nih avangin an tuikhuah hmun pui kan thleng pawh a pui hle mai. “Ship Lock” (Tuikhuah tui kawngkhar) chhawng nga lai kan kaltlang a, kaltlang chhung pawh darkar thum chuang kan hmang a ni. Lawng chuang ngai lo tih taka ka tan chuan experience tha tak a ni. China ram chhung hi Pathian zarah kan khaw bul leh a chhehvel chu ka tlawh ve nasa tawh hle a mahse tuntuma ka zin hi chu nuam ka tih ber pawl leh ka rilru khawih ber pawl a ni awm e. Hetiang ang hun tha min pe tu Pathian chu ka fak a ni.

Krismas Xi’an ah
Yangze lui dung fang a kan zin Krismas tukah kan thleng a. Rel chhunga kan kan thil ei in ka pum a tih nat deuh avangin kan pawlte inkhawm ka zawm thei lova. Amaherawh chu chhun chaw ei chuan kan pawlte ka va zawmve thei. Kan hotupa te chhungkua in kan eitur an buaipui a, kan ruai theh pawh Australian takin kan theh ani. A chang chuan mizo taka kan ruaitheh hi a ngaihawm veng veng thin. Ka dam sam nep deuh avangin ka haw hma a hahchawlhnan hun ka hmang nileng.

Exam chhunzawm leh New Year Party hrang hrang
Krismas hi helaiah chuan chawlh a ni ve lova, amaherawh chu foreigner zirtirtu hote chu duhsakna bik avangin ni hnih chawlh min pe thin a. Tichuan, 26 December ah class kan kal leh ngal a, exam neiin ka buai leh nghal char char. Tin, ka sawi tawh angin, ringlotu ram ni mahse Krismas hian nasa takin Chinese thalai zingah hmun a luah tawh a, a awmze diktak hre miah lo pawh hian an ur ve nasa hle thin. Tun kum pawh hian kan department a pawl hrang hrang hruaitu ten a lawmnan program an siam nasa hle a, keini ho pawh min sawm ve thin a. Zantin deuhthaw hetiang lawmnaah hian ka kal ve a ni. Amaherawh chu Isua a piancham kan lawm ber erawh chu a lang lo thei hle a, Krismas putar ‘Santa Claus’ hian Isua aiin hmun a luah thuk zawk a. Krismas card te pawh Krismas putar lem hlir a chuang hlawm a ni.

Mizote Krismas ruai theh ve
Aizawl Town B Kohhran te hnen atangin duhsakna ropui tak mai kan dawng a. Krismas ruai kan lo theh ve nan tiin Rs. 3000/- lai mai min rawn thawn leh a (Nikumah pawh min rawn thawn tawh). An mi duhsakna a ropui kan ti a kan lawm hle. He an pawisa rawn thawn hian Pi Zomawii hovin Indian Restaurantah ni 31 December khan ruai kan va theh ve in hun tha tak kan va hmang thei. Tin, heta kan pawisa hman bang hi Pi Zomawii min rawn angin Jenis-i nen kan insem leh a ni. Aizawl Town B Kohhran te avanga kan malsawm dawnah kan lawm tak zet a, midangte tana malsawmna an nih zel theih kan duhsakna kan hlan a, a kan tawngtaina pawh a ni.

Lawmna
Tunkum chhunga Pathian min hruaina a ropui ka ti a, tling lo taka a rawng ka bawlve tek tek thinnaah malsawmna tamtak min la vur hi ka phu lo tih chang hi ka ngah hle. A chang chuan beidawnna khurah te ka kal thin, ka dinhmun hi kei chuan khirh tih em em chang te ka nei thin a. Amaherawh chu Job a nun kha min zirtir ni hian ka hre thin. Ka chunga thil thleng te hi a chhan leh avang ka hre lo fo thin a, beidawng taka ka awm chang a awm thin. Nimahsela Job a nun ka en a, harsatna karah pawh Pathian sawichhiat aiin a fak zawk thin. Pathianin Job a lakah a hmel a thuhruk pawhin, Job a chuan beiseina nung nen Pathian a hmuh theih loh hnenah chuan a tlulut tlat thin. A chunga thil thlengah Setana kut thak hnawih a ni tih hre lova Pathian tihah a ruat chung pawhin Pathian a la fak fova. Pathian a hmangaihna leh Pathian tana a rinawmna thuk tak maiah hian zir tur ka ngah hle in ka hre thin. Hetiang anga Pathian hmangaihna thuk ka neih theih nan hian kohhran hote min lo tawngtai sak fo turin ka han ngen a che u. In zavaiin Kumthar chibai ule.

Tling lo taka Pathian tana in rawngbawlpui,

Puii

Newsletter Nov

MyUpdate 5_12(Nov ‘07)
4^th Dec ‘07

Rawngbawlpui duhtak te,

“Ber” thla hnuhnung ber kan lo kai leh ta der mai. Hriat loh karin hun a kal zut zut mai. Hei November thla a Pathian min hruaina kohhrante hriatah ka han tar lang leh dawn a, Pathian hnathawh tam tak avangin Pathian hnenah lawmthu min lo sawipui zel turin ka han ngen a che u.

Hotupa Walt an min tlawh
America ram mi, mosolman ho zinga Bangladesh rama rawngbawla lo awm hrep tawh Walt an kan pawl min rawn tlawh a. Mosolman ho zinga rawngbawl dan min rawn zirtir a kan hlawk hle. Tin, ani hi GIA ten an thawhpui a ni a, mi thiam tak mai a nih avangin a tangkai hle. Pathianin hun tha tak mai min pe a, chaweiah sawmin ti ti na hun tha tak kan neih pui thei. Pathianin min koh chhuah dan te, he ram a ka lo luh dan te, ka hmalam hun a ka beiseina neih ve te, ka harsatna te chhipchiar tak in min zawt a, ka theih ang angin ka hrilh ve thei a. Tin, rawngbawlna lamah a mikhual lo bawk a ka harsatna te min hriattiampui hle mai a a thlamuam thlak hle.

Zirlaite Chaw eiah sawm
Helai a kan awm chhan ber pakhat chu kan zirlaite hi an ni a. Kan theih ang ang a hma kan lak ve naah Pathian pawhin mal min sawmsak nasa hle in ka hria. Ka mail hmasa a ka han tarlan tawh ang khan Australia lam a min rawn thlawhtu GDT thiante thlah pah nan tiin kan zirlaite zinga an kawm ngeih deuh hlek te, leh Pathian zawng ni a kan hriatte tan ka inah chawei kan siam sak a. Hetah hian kan University a mi lo te mahse thian kan siamthar te sawmin hun tha tak mai kan hmang ho thei a nuam kan ti hle. Tin, kan GDT nula te pahnih phei chu thlahnih ngawt mai an rawn cham hnu a haw tur an nih avangin mittui tla zawih zawih he hun hi kan hmang ho. Pathian hla, a ram mi te tawng ten kan sa ho va kan hlim hle. Hetianga hun hi kan tan chuan inlaichinna tih nghehna tha tak a nih thin avangin a chang chuan peih lo chung chung pawhin a tangkai em avangin kan tih luih hram hram te a ngai thin. Pathianin chakna min la pe zel a, ka phak ang tawk tawkin ka ti thei zel a hei pawh hi malsawmna nasa tak a ni.

Free talk Pathianin hmang tangkai
Free talk ka neih ni hi chuan ka huphurh thei thin hle mai a. A chhan pakhat chu kan naupangte hi an naupang deuh avang leh an saptawng thiam chin hi a ‘thora’ theih em avangin tawng an harsat hle thin a, a tawpah hian ka duh aia tam hi ka tawng leh thin. Amaherawh chu naupangte avang chauh hian ka inti pachang hram hram a, tha tak chuan ka nei ve leh thin. Ghana ram mi thawhpui fel deuh mai ka nei a, a ni hi ringtu a nih ve tho avangin kan rilru tum a in man em em a, a chang chuan “THU” kan sawi teuh chang te a awm thin a kan lawm thei hle.

Kan free talk ah hian kan School naupang lo te pawh an lo kal thin a, chung zing a mi pakhat Maria-i chu saptawng thiam tak a ni a. Ni khat chu, ka inah thingpui inah reilo te ka sawm a. Ka ti ti in a chanchin te min hrilh mawlh mawlh pah a hawi vel chuan dawhkana Pathian Lehkhabu ka dah chu a zuk hmu a. “Pathianthu I chhiar thin a law? I ring em?” tiin min zawt a. Ka rin thu leh ka nunna a nih zia leh harsatna ka tawh chang pawh a min tanpuitu tha ber a ni thu ka hrilh a. Tichuan, English major a nih avangin an hotupa in Pathian Lehkhabu chiar tura a tih thu min hrilh a. Pt lehkhabu a la chhiar ngai loh thu te, a thiannu in an chhiar rik a ngaihthlak thin thu te min hrilh a. Vanneih thlak takin a pekchhuahtur ka neih lai tak a ni hlauhva, tichuan, a duh chuan ka pek theih thu ka hrilh a. Lawm em em in ka thilpek chu a la a. Keipawh ka pekchhuah avangin ka rilru chu a nui ver ver bawk a. A chhiar dan te kan in zirtir a, tichuan Pathian Lehkhabu a neih thar avangin hlim takin ka in a chhuahsan ta a.

Maria-i nen hian a hnu leh ah ti ti na hun kan nei leh tawh hran lova. Mahse Pathianin a hruai zel ang tih ka ring a, a nunah Pathian tih mi leh Ama tana mi tangkai an lo kal theih nan erawh chuan tawngtaipui a ngai hle. Ka lehkhabu pek a vang hian ka hmaah Pathianin a rawn hung kher lo thei, amah erawh chu Pathian in mi tamtak he ramah hian Ama tana in hmang duh mi a nei tih ka hria a, chung ho te nen a an intawn theih nan erawh chuan tawngtaipui a ngai hle.

Min tuh tir a, a par min hmuh tir a, a rah min seng tir bawk!!!
Hetia ka ngaihtuah chian ringawt pawh hian Pathian min dahna leh min hruaina hi a ropui ka ti a ka hnuk a ulh fo thin. Mi tlinglo te a hman theih dan hi a ropui ka ti. “Mi tling lo te a siam tling thin” tih hi a takin keimahah hian ka hmu chhuak fo thin. Ka naute ka zirtir thin te kha tunah hian kum thumna tur kan kal chho mek a. Kum thum chhunga Pathian minhruaina kawng hi a thui ve hle mai. A tantir te ka ngaihtuah thin a,hetiang ang dinhmun hi ka thleng phak ang tih ka suangtuah ngam ngai lo a ni.

A tantirh atanga kan kal dan zawng zawng sawi dawn chuah sawi tur a tam em a, tun tumah hi chuan ka rilru khawih thar tu kan han tar lang hlek duh a ni. Ka naute zinga Livia hi ka tih ve thin kha a then chuan in hre mai thei. Nipui chawlh lai khan Pathian hruaina nasa tak mai a chang a, Pathian a thinlung zawng zawnga hmangaih tur a nih zia Thlarau hriattirna thar a dawng a. Tichuan, tun semester ah ringawt pawh hian a thiante zingah nasa takin Pathianin a hmang a. An kohhran thalai ruahhmanna in, kan province thenawmah hian ringthar kohhrante tlawhna hun an nei a. Hetah hian Pathianin nasa takin a nun hmangin midangte a khawih a. A rawn hawng kan ti ti chu mittui tla zawih zawihin Pathian hnenah lawmthu kan sawi. Tin, he a zin atang hian Pathian tan engtikah emaw chuan kohhran din a duh thu te an sawi ka ngaithlak khan ka mittui a thla lo thei lo a ni. Hemi mai pawh ni lovin a rawn haw hnuah thian a chhar thar a, a hun tamtak he a thian tan hian a pe a, tunah hian a thiannu hian a nun Pathian hnenah a hlan ve ta!! Pathian chu fakin awm rawh se!!

Ka naute hi Pathianin ringtu nausen an nih lai atangin min hrual tira, kawng bumboh tak tak kan kal ho chang te a awm a. Zawite in Pathian hruai nun neih awmzia an hrethiam chho leh a, tunah hian rah chhuah nun an zir chho a, a tak a rah chhuak thei a an awm ka hmuh hian Pathian a ka lawmna hi min hriatthiampui ngei in ka ring. A chang chuan keimah ngei pawh ringhlel chunga ka kal chang te a awm lai a heti em a min hruainaah lawmthu min han sawipui mawlh mawlh te u!!

Mimal kawm thin kal zel dan..
Ka update hmasa ah te ka rawn ziah thin ang khan ka nau Victoria-i nen khan ka la inkawm chho zel a. Amaherawh chu thil hi kan beisei ang leh kan duhthusam hian a thleng vek kher lo. Beiseina sang takin neiin Pathian a hmuh ve hun ka thlir chhoh mek laiin kan han ti ti tak tak chu Pathian a zawn loh thu leh a mamawh lo thu min han hrilh chu a beidawn thlak duh hle. Nimahsela Pathian hnathawh dan leh kan beisei dan a in ang vek loh avangin, Pathian hruaina ah ka ngai zel a. Pathian mamawhna a neih loh chhan pakhat a sawi ah chuan a ma pa hi a pathian a nih thu leh, a mamawh hunah chuan a a harsatna te a hrilh a a tanpui thin thu min hrilh a. Kan ti ti zel naah ka hmuh chhuah chu tleirawl rilru mumal neih thiam loh lai a kal chho mek a ni tih min hmuh chhuah tir a. Tun dinhmunah hi chuan Identity Crisis a nei nasa lutuk a enge a duh leh ama tana tha tur pawh a ngaituah thiam lo a ni ber mai. Chuvang chuan Pathianin hnenah a mamawh a hriattir theih nan leh khawvela a inghahna te, a bik takin a pa a a inghahna, a pheh lo chuan Pathian hi a zawng tak tak dawn lo a ni tih min hmuh chhuah tir. Tawngtaipui kan ngai dun hle hemi kawngah hian.

Cultural Dinner (International Dinner) buatsaih leh
Tuna ka thawhnaah hian ram hrang hrang atang zirtirtute awm khawm kan nih avangin, ei leh in lamah kan in hriat tawn theih nan tiin kum hnih ka awmna ah khan Cultural Dinner ka buatsaih a. A zawngchhang thlak em a ka hriat avangin hei kum thum ngawt chu ka buatsaih ta. He Chawei khawmna hunah hian kan thiante an mahni ram a an chawhmeh theuh an rawn keng khawm a kan ei ho ta thin a kan hlimpui thei hle. Rinna lamah chuan kan in lungrual lo hlawm hle mai a, sakhua nei lo leh sakhua at chilh leh a hming a sakhaw nei ve mai mai awm khawm te kan nih laiin, ei leh in lamah chuan kan in sawisel lo tlang hlawm khawp mai. Tun tumah hian mi 30 vel lai mai kan kalkhawm a ka lawm ve hle. Ka rawngbawlna pakhat ni ve in ka hria a Pathian pawhin mal a sawm in ka hria. Hetia kan han party hnu ah hi chuan kan in pawh phah sawt thinin ka hria a ka lawm ve hle.

Chhandamtu Piancham boruak in ur chho
Kan hma a hun pawimawh tak Isua Piancham lawm dan tur chi hrang hrangin kan ur chho leh ta. In cheimawina thil phei chu dawrah November thla tawh khan an tar chhuak daih tawh. Classroomahte he hun chanchin sawi turin kan inruahhman tan a, kei phei chuan ka tan der tawh. Tin, kan department ah phei chuan a ram neitute ngei pawhin party buastaih tumin an ur tan der ta mai. Pathianin classroomte leh a lawmna chi hrang hrang kan telve theihnaah te Christmas awmzia tak tak kan hrilh darh zel theihna tura hun tha min pe theih nan min han tawngtai pui zel turin ka han ngen nghal duh bawk che u a ni.

An ziah hi chuan rin ai hian thu ngah a awl thin. Engpawh nise kohhrante hnenah in mi dawl reng thinna ah lawmthu ka han sawi mawlh mawlh e. In zavaiin Christmas chibai ule.

Dam takin,

Puii

Newsletter Oct

MyUpdate 5_11(Oct ‘07)
6^th Nov ‘07

Rawngbawlpui duhtak te,

Hetia kan chanchin kan han ziak thin hi mi thenkhat tan chuan ninawm lamah te pawh a kal mai thei a, mi thenkhat te tan hlawkna pawh a lo ni ve thei bawk a. A eng pawh ni se, chanchin inhriat tawn hi kan in tih chak tawnna ni a ka hriat avangin ka han tar lang leh dawn a ni.Thla kal ta a ka hun hman dan te leh Pathian min hruaina ka chan te ka han tarlang leh dawn a dawh thei taka min han chhiar sak leh turin ka han ngen a che u.

National Holiday kar: National Holiday karkhat chawlh kan neih thin hunah khan kum danga tih thin angin kan Uni a Foreign Affairs Office ten hnamdang zirtirtu te tan zinna hun tha tak mai min siam sak leh a. Tun tumah hian, China rama hmun mawi an sawi lar tak tak te, Sichuan province a Huanglong leh Jiuzhaigou ah min hruai a.

Huanglong hi Calcite lung, lei khi chat inkar a leihnuai tui carbondioxite tam tak pai lo chhuakin a tui mawi tak tak a a khuap na hmun a ni. He hmun hi a nalh em em mai a, tuihna pakhat atanga luang chhuak mahse hmun hrang hrang a rawng inang lo, mawi tak maiin a pharh duai mai. Chutiang bawkin Jiuzhaigou pawh leilung che velin tuikhuah hmun hrang hranga a siam, tui pawh rawng chi hrang hrang, a hring te a pawl te a, mawi em em maiin an awm a. Heng hmun a ka kal hian Pathian kutchhuak ropui zia leh A siamtu an chawimawi sia ka hmuh khan Pathian ka fak mawlh mawlh mai ani.

University bus a kal kan nih avangin kan hun tamzawk hi kawngah kan hmang a, ruah a sur duh bawk a, amaherawh chu thingtlang kawng a kan kal tam avangin lung a tileng hle. Tlangram kan kal tlang lai phei chuan kan ram ka ngai hle. Chirhdiak hmun tak tak te pawh kan tlanpel ve zut zut mai.

Tlawhtute: Pathian hruainain kan pawlte hian tlawhtu kan nei ve neuh neuh thin a, tun semester pawh hian Sydney khaw bula kohhran pakhat thalai ten min rawn tlawh a. Hetia min rawn tlawh cross –culture rawngbawlna awmzia zir tur te, ke an rawn pen chhuah atanga Pathian kohna dawn beisei te, rah chhuak kohhran nih a tangkaina hria a lokal te an ni fo thin. Hetianga min rawn tlawhtu te an awm hian helai a hmuthu te tan min cho thar tu tha tak an ni fo thin. Kan students ho zinga kan rawngbawlna te min rawn tawiawm a, naupangte nen titi na hun te an nei a, heta tang hian Pathian zawngtu thar te kan hmuh chhuah phah fo thin a ni. Tin, tunah hian GDT member pahnihte thlahnih chhung kan zinga khawsa mek te an awm bawk a, heng mite hian ka free-talk an te min pui thin a ka hlawkpui thin hle.

Ka naute harsatna: Ka naute ka zirtir thin te ho hi kan tan chuan helaia ka awm chhan leh beiseina min pe tute an ni thin a, harsatna an tawh te hian, min khawih ve nasa thei hle. Tun semester a zawh hian an graduate dawn tawh avangin nasa takin hna chungchangah an rilru a hah thin. Hnem ngaihna dang awm a ka hriat loh avangin mangang lo tur leh Pathian a innghat turin ka lo hnem thin. Amah erawh chu, hetia ka lo hnem hian thlamuanna tak tak a thlen tihna a ni kher lo thei chuvang chuan tawngtaina lama tan lak a ngai nasa hle. Hna zawn hun a nih avangin in tawngtainaah min lo hriatsak pui turin ka han ngen duh che u a ni.

Pathian hnathawh ka naute nunah: Ka mail hmasa a ka rawn sawi tak ang khan Pathian hnathawh nasa takin ka naute nunah ka hmu chho zel a, Pathianah lawmna tur hi a thar hian min hmuh tir reng mai in ka hre thin. Tunah hian ka naute pahnih chuan hna tha tak mai an hmu a, Pathian hruainaah kan lawm thlang hlawm hle.

Victoria-i chanchin: Ka newsletter hmasa a ka rawn sawi tawh ka nau pakhat ka zirtir thar, Victoria I chanchin kha tlem han sawi ka duh a. Friday tlaiah kan inhmu thin a, tlai khat chu Pathian thu zir lova ti ti mai mai a duh thu min hrilh a. Chutia kan han ti ti chu a harsatna chi hrang hrang min hrilh a duh a lo ni a. Amah chauh lo kan zirlai tam zawk te hian a harsatna ang hi an harsatna tamtak a ni a. Thiante a rinna nghah ngam lohna te, nu leh pa te leh fate inkara khi awm te, pawlpuite inkara in rel tawnna te, leh beiseina mumal neih lohna te hian nasa takin a tibuai a, chu chuan a lehkhazir lai mai pawh nilovin a nun ah nasa takin nghawng a neih thu min hrilh a. A chang chuan a zir zawh hun tur a huphurh a, a chhan chu a chhehvel a inlaichinna (relationship) te a en a a rilru tina tu tamtak an awm avanga hna zawn a huphurh thu te min hrilh a. Hna a thawh hunah a thawhpui ten a harsatna an siamsak tur te a ngaihtuah lawk a chuchuan a rilru ah beidawnna tamtak a pek thin zia te min hrilh a. Tichuan, ka thiam ang angin ka hnem a. Kan inlaichinna, nu leh pa te, thiante hian hlimna tluantling min thlen loh zia leh kan rilru tina tu an ni fo theih thu te ka sawi a, Pathian ah lo chuan inlaichinna famkim a awm loh zia te ka hrilh fiah a. Hemi a nih avanga Pathian nen a inlaichinna tha neih a thlamuanawm zia te ka thiam ang ang in ka hrilh ve a. Victoria I ang hi kan zirlaite ah hian a tamzawk an ni hial awm e. Kan naute hi tamtak chu hetiang beidawnna khurah hian an lut mek a, Lal Isua an nunah thlamuantu leh thiantha a nihna hre lo hi a tam zawk te an ni.

Victoria-i nunah hian lawmna tur tamtak ka hmu chho zel a. Kan in hmuh leh chuan, Babel insang sak atanga Sodom leh Gomorra tihchhiat a nih thleng khan kan zir duh a. Zawhna tha tak tak mai min zawt thin a, hengte zinga ka rilru khawih tu pakhat chu, “Pathian khan mihring tawngte kha a tih danglam vek si a enga tinge tuna hian hnamdangte tawng hi kan la zir fo?” tiin min zawt a. Engtinge ka chhan ang aw ka tia ka ngaihtuah chuan heti hian ka chhang ta a, “Pathian kut chhuak te kan ni avangin kan inlaichinna hi a ngai pawimawh em a, inlaichinna Pathian (God of relationship) a nih avangin kan inzawmna tih chah hi a phal lo a lawm,” tiin ka chhang a. “Abraham a kha engatinge Pathian khan a hming a thlak sak?” tih min zawhna chu tihian ka chhang a. “Abraham a hming awmzia hi ‘hnam tamtak te pa’ tih a ni a, Pathian in Abraham a hnenah hnam tam tak te pa ni tura a tiam lai khan, Pathian thutiam hi a la thleng si lova. Tichuan, Pathian thutiam hi Abrahama atanga thleng tur chuan Abrahama hian a rin hmasak a ngai a. A hming hi Abrahama a lo nih takah chuan mi tamtakin nitin an ko an ko dawn a, chutia an koh an koh takah chuan amah a Pathian thutiam kha a hre thar zel dawn a ni. Chuchuan beiseina nung a pe thei dawn a ni. Tin, Abraham a hian thil a hmuh si loh kha a rin a ngai a chuvang chuan hrilh nawn fo a ngai a ni” tiin ka chhang a. Chutia kan sawi zo chu, “E he! Kei ma rinna nen chuan a in let thawk a nih chu, kei chuan ka hmuh loh chu rin harsa ka ti,” tiin min chhang a. Hetia a sawi zawh hian ka thaw huai mai a, a chhan chu Pathianin kan thil zir atangin a mit a tihvar sak zel a ni tih ka hmuh hian nasa takin beiseina nung min neih tir nasa hle.

Yan’an leh Hukou waterfall tlawh: Pathian malsawmna ka dawn tamtak te zinga pakhat chu ka thawhna Uni hruaitute hian man chanve chawia zinna min siamsak thin hi ka malsawm dawn pakhat ka ti lo thei lo. Kan khaw chhehvel a khaw tamtak an hming pawh ka hriat sen loh hi ka tlawh ve tawh a. Tun tuma kan khaw tlawh pawh hi Chairman Mao an sorkar thar siam tura a inkhuarna hmunpui kha a ni a, he ram tana hmun pawimawh tak a ni. Tin, kan province leh kan thenawm province Shanxi hi lui lar tak mai Yellow river kan tih thin khan a athen a, hmun pakhat ah hian tui-khawh-thla mawi tak mai a awm a chungte chu min thlawh pui a… Hetia kan zin khawngah hian Pathian thilsiam mawi zia ka hmunin Pathian ka fak mawlh mawlh a ni.

China ram TV ah lang ve dawn! : Kum nga dawn lai mai han awm ve takah chuan kan lar ve tep ta! China rama national TV Channel pakhat CCTV 2 chuan kan khaw bul mai, Hot-Spring an tih, Chiangkaiseka an manna hmunah khan program ropui zet a buatsaih a. Kan Uni a foreign teachers Chinese tawng ti ve thei deuh panga an thlan chhuah zingah ka tel ve hlauh mai a!! Kei aia tawng thiam tam tak karah min thlang ve hi ka nuih a za ang reng khawp mai. Hetah hian Mandarin nilo, kan province bik a an tawng hman hla pakhat kan va sa a. He program ah hian an milar tamtak, China ram mai pawh nilo khawvel a hming chher tham a lar te pawh an rawn kal a, an in buatsaihna a ripui tek tek hle. Current in a zo lo tih a awm ve lo reng reng. Tlang bul thut a buatsaih a ni a, zanah chuan arsi lem hi a tlangpang khat hian a de chuai mai a ni. Kan rama thingtlang pakhat budget an hmang zo ang a tih theih awm a ni. Zan a ni bawk a kan de chuai chuai mai ani. Kan program hi ka thu ka ziah lai hi chuan tihchhuah a la ni rih lo.

Pathian min hnuaina tamtak ka dawn karah hian min ti hnual tu te hi an awm ve reng thova, chuvang chuan in mi tawngtaisakna ka han ngen nawn leh mawlh mawlh ani. Ka ngaihtuah sual chang chuan, keima hna chu nise ka haw sanna hi a rei tawh ang ti a ka ngaihtuah chang hi a la awm reng mahse, keimah kaltlang a kohhrante rawngbawlna a ni tih ka hriat hian, tumah hi ka ti hnual thei a ka hriat loh avang hian ka in tih pachang hram hram chang hi a la tam hle. Min han hre chhunzawm zel turin ka han ngen a che u.

A ropui nan

Puii