Dated:12th Sept 2007
Hun rei tak ka chanchin rawn ziak lova ka awm hnu in hei tun tumah hian Nipui chawlh laia Mizoram a ka hun hman dan tlangpui leh Pathian min hruaina te han tarlan leh ka duh a. Mizorama ka awm chhungin min duhsak tu leh thahnemngai taka min tawngtaipui thin tute hmel leh an mi fuihna thu te ka dawng nasa a ka lawm hle. Chau tak chung leh tlin lo tak chunga kan rawngbawl ve na te min ngaihhlut sak thin tute leh kan report lo chhiar thin tuten “Han ziak zel teh u, in chanchin a ngaihnawm thin” ti a min han hrilh te khan min cho nasa hle. Mizoram a ka haw chhungin Pathian min hruaina te ka chhut a, a nasa a a mak tih chang pawh ka ngah hle a ni. Ka theih anga tawi fel a han ziah chhuah kan han tum leh anga, dawhthei takin min lo chhiar sak hram hram dawn nia.
Xi’an Chhuahsanin Hongkong lamah: Tun tum chu remchanna leia Hongkong tlawhve ka duh avangin ni 2 July khan Xi’an ka chhuahsanin Hongkong ka pan thla a. Hongkongah hian Baptist Theological Seminary ah ka thleng ve a. Ka thlenna hi a laili loh angreng avangin veivahna duh aiin a buaithlak a. Tichuan, ni li chhung lai ka cham a, Hongkong khawpui a tlawh awm a ka hriatte ka tlawh ve a. Vanneih thlak tak main Pu Duhthlana tuna Indian Embassy a Consul General ni lai mek te inah zan khat riahna hun tha tak mai ka nei thei a. An chhungkua in duhsak takin min lo thlengin min lo mikhual a ka phu lo ka in ti hle a mahse Pathian avang a ni tih ka hriat erawh chuan ka lawm hle. Ka tana malsawmna nasa tak an nih avangin lawmthu ka sawi mawlh mawlh a ni. Tichuan, ni 7 July zan dar 11 khan New Delhi lam panin Hongkong chu ka thlawh chhuahsan leh ta a ni.
Dil loh Malsawmna Delhi ah: Ka mail hmasa a ka sawi toh ang khan vanduaithlak tak main Delhi ka thleng a ka ticket ka ti bo ta tlat maia. Mizoram House lama phei tura ka inbuaipui velnaah China a ka chho lehna tur ticket (return ticket) chu ka ti bo tlat mai. A tantir chuan ka rilru a na khawp mai a. Rukru tamna khuaah kan awm a, a theih ang chuan ka fimkhur ve in Pathian zarah ka thil pawh hi ka tibo khat hle mai a, mahse ka ticket ka tibo ta tlat mai kha ka rilru a na ve hle a. Amaherawh chu ka inngaihtuah chhuak vat a, “Pathian hriatpui lohvin engmah a thleng lo” ti hian ka rilru ka in hnem a. Pathian hnenah ka inhlan nghalin lawmthu te ka sawi nghal a. Tichuan, vanneih thlak tak maiin Pathianin min tanpui turin MAP Commandant Pu. Shanliana a lo dah thlap mai a. Ani hian Airportah te min kalpuiin Airlines office ah mi hmuh tul ang zawng zawng te min hmuh pui a, ka ticket ka neih leh theih nan a ka hriattur zawng zawng te min zawh kual pui char char a. Ni hnih chhung mai Delhi khawpuiah veivahna inbuaipui ngai miah lovin min buaipui a, ka lawm dan chu sawi sen a ni lo. Kalna apiang mai Pathian hian Ama tana in ui lo leh Ama rawngbawl duh mi te hi Ama rawng inbawl nan hian a lo hmang thin a ni tih min hmuh chhuahtir nasa hle in ka hria.
Delhi a ka cham chhung hian Pu. B. Vanlalvawna, Shanghai lam atanga min awp thin tu te Delhi lamah min pem san ta a, Delhi a an in lamah chaw te eiin riahna hun tha tak te ka nei thei a ka lawm hle
Mahni ram lamah: Ni 10 July khan tluang takin Aizawl ah ka thleng chhova. Lawm tizual em em tu pakhat chu ni 6 July khan Pathianin kan chhungkuaah member thar duhawm tak mai Malsawm Dawngzuala min pe a. A Chinese hming atan “An” (安) ka phuah a, hemi awmzia hi “Muanna” tih a ni. Ante-a tiin kan kova kan hlim pui hle.
Aizawlah hian ka ticket bo chungchangah FIR te buaipui ka ngaih chhunzawm zel avangin Pu Shanliana bawk chuan min buaipui zelin engkim min tih fel sak vek a. Pathianin min pui turin Pu. Lalthanmawia leh H. Lalthapari te min pe in ka mamawh hun takah heng mite hi a rawn tir a, ka lawm hle. Pathian hun ruat fel zia min hmuh tir in vantirhkohte hi hmun tinah hian a lo dah a ni tih min hmuh tirin ka hria.
Hmunpui lamah: Aizawl lamah engemaw chen ka hahchawlh hnuin kan kohhran hmunpui Lunglei lamah ka va in report a. Kohhran lama kan hotute leh thawktuten hlim takin min lo lawm in ka mamawhte min lo buaipui thin hi lawmawm ka ti thin. Tin, kan rawngbawl zel na tur a hma an lak thinna te hian beiseina thar tamtak min siam thin. Thlakhat lek India rama ka cham theih avangin kum danga kohhran thlawh kualna hun ang kha min siam sak lova, amaherawh chu keima zawk in thlarau lam pur chaw lak nan ka hun neihte ka hmang thei a ka lawm hle a. Hruaitute min ngaihsakna leh hriatthiamna ah lawmthu ka sawi mawlh mawlh a ni.
Thlarau lam chaw ei: Vanneih thlak takin Aizawl a ka cham chhung hian GP Herald Team ten Pu Huliana hovin camping chhawng li lai mai kan kohhranah an nei a. Hemi chhung hian ka theih ang ang a thlarau lam chaw ei ve tumin campah te ka lut ve a. Pathian thu tak a inchiahna hun tha tak mai ka nei thei a ka lawm hle. Kohhrante zinga han tal tamna hun tha ka nei thei te kha a lawmawm ka ti hle. Kohhranten min thlahthlam loh zia te ka hmuh in ka thla a muang hle.
Haw kawng malsawmna: India rama thla khat erh awrh ka cham chhung hian thil tamtak ka beisei loh tak tak ka tawng nasa hle a. Mihring program a lal lo thei hle a, mahse Pathian program in a thlak zel a ni tih ka hria a ka lawm zel. Ka chhungte, thiante, kohhran hote dam takin ka hmu thei a an bulah hun te ka hmang thei a ka lawm hle.
Tichuan, ka hawnna tur ticket Delhi lama tihfel ngai ka neih avangin ni 16 July khan Delhi ka chhuk thla a. A hma a tum sa em em awm lovin, Teteii DevPro lama an hotunu zarah
DevPro Centre ah thlenna hun remchang tak mai ka nei a. DevPro Centre a ka thlen chhung hian mak tak takin Pathianin Beramvengtu (Psitor) min rawn tawngtaisak turte a rawn tir a, tin, hnamdang ringtute nen a inpawl hona hunte kan nei thei a a ropui ka ti hle. Tin, DevPro lama thawkte Mahruaii te, Teteii te Tara te ka kaltlangin Pathian malsawmna ka dawn nasa hle.
Ni hnih lai mai ka ticket buaipuiin ka buai hle a, tin ka beisei loh tak maiin ticket a thar hlak lei ngai ten kan awm a. Ka tum ang reng reng hian ka awm lo tluan chhuak thak a. Nimahsela heng ka chunga ka thil thleng avang hian vuina tur reng reng ka hre lo. Ka mamawh zawng zawng min phuhruk a, thlachhamin ka awm lo a ni. China rama tanga ka haw thlak hma hian Pathian hnenah “Lalpa tun tum ka haw hi thlarau lamah tuaithar ka ngai em a chuvang chuan thlarau malsawmna ka dawn theihna turin min hruai ang che” tiin ka tawngtai a. Pathianin ka tawngtaina a hria a, ticket bo atangin min chhang niin ka hria a ka lawm hle. Pathian hnenah “Lalpa ka thil neihte hi ka ta a ni lova, i hnen atanga ka dawn mai a ni. Ka nunna chawp hian i ta a ni a, chuvang chuan ui tur ka nei lo a ni. Nangin min pe a, min laksak leh thin i hming a lo ropui nan chuvang chuan ka ticket bo avanga ka hma a mi i rawn hruai zawng zawng te avangin lawmthu ka sawi a, ka thil tawn zawng zawng te avang hian lawmthu ka hrilh a che” tiin lawmthu ka sawi a ni. Pathian chu kan inhumhimna a nih zia ka thil tawn atang hian ka hmu chiang thar hle in ka hria a ka lawm hle.
Tichuan, ni 22 August khan ka thawhna lam tluang takin ka thleng chho leh ta a, class kal hma in chawlh hahdamna hun tha tak ka nei thei a ka lawm hle.
Dam takin
Pathian ropui nan
Puii
DevPro Thiante thlalak ka han zep tel e
Mahruaii & Tara - Guys you are a blessing!!
Push-a airport a min rawn lama min thlah tu - "Pathian rawngbawltute hnen atangin pawisa ka la duh lo"
An-tea ni ,i NL a ngaihnom e, i hritlang poh dam vat rawh se...Da zhen kha a tha a nia!!!
ReplyDelete