Sunday, August 19, 2012

Sorkar Hriatpui Kohhranah Ka Inkhawm

Vawiin chu ka thiannu nen Sorkar Hriatpui Kohhranah kan va inkhawm ve a ka lawm hle. Kan inkhawmna kohhran hi Beijing Haidian Christian Church an ti a, Chawlhni chawhma hian inkhawm hun li an nei a ni. Zing dar 7:00 -8:00; 8:30 - 9:30; 10:00- 11:00, heng hunah hian Chainis tawnga inkhawm kaihruaina hun an nei a, a tawp ber 11:00 ah hian Saptawnga kaihhruaih inkhawm an nei bawka. Saptawnga kaihhruai inkhawm chhim chuan ka thiannu nen kan va kal ve a, nuam ka tiin, ka thil tawn zen zen loh a nih avangin ka lawm hle. 


Biakin kan thlen phei hian kan hmaa inkhawmte an la ban loh avangin biakin sirah kan in tlar a, inkhawm bang lo chhuah veleh lut mai thei turin min inthlar tir vek a. Usher intlar dan lo siam fel tur ringawt pawh an tam khawp mai. Inkhawm hi a indawt zatin zing dar 7 atangin a awm a, a inbanlek zung zung bawk a ni. Kan inkhawm hunah pawh hian inkhawm bangte nen kan in sul pel nuai nuai mai ani. 

Sorkar hriatpui kohhran a ni a, rilru ah hlauhthawnna engmah awm lova han inkhawm ve hrim hrim kha a nuam hle in ka hria. Kan inkhawm hruaitute thalai tak tak an ni a, an saptawng hriat a har deuh hlek thin tih lovah chuan an hruai tha ve hle. Worship Team in fakna hla a hruaiin inkhawm kan tan a, chumi hnuah chuan Thusawitu a rawn ding a. Thusawitu hian "Becoming the person God wants you to be" tih thupui a rawn thlang a. Baibul a mi larte, Mari leh Paula te nun atanga kan zir tur a rawn sawi chhuak a. Pathian tana bawih an nihna an inhriatna atangin Pathianin a ti tur a an tih te an tih thin zia leh chumi atanga Pathianin a siam chhan leh a dinchhan an nunpui zia te, Pathian an duhdan a an nun a hman avanga an chan te a rawn sawi chhuak a, ka rilru a hneh thar hle. Keima nun ka thlir a Pathian min kohna ah leh min din chhan hi ka nun chhuahpui lo hle in ka hria a, min cho thar hle. 

Kan inkhawm hun chhung hi darkar khat vel a ni a, ka kham lo hle. Amaherawh chu kan rama zalenna kan neih ang kha an neih ve loh avangin, an inkhawm theih ni ah chuan a tam thei ang ber inkhawm theih dan ngaihtuahin zing karah pawh vawi li inkhawm an huaihawt a ni tih kha hria a. Chainis ringtu te zinga Pathian faka zai leh chawimawi thei a ka awm avangin ka lawm a ni. 


A hnuaiah hian he kohhran link ka han dah e, hre chiang duhte kan awm takin:
http://english.hdchurch.org/

2 comments:

  1. Inkhawm ve a chakawm mang e. Biak In pawh a lianin a fai hmel hle mai.

    ReplyDelete
  2. A ngaihnawm hle mai. Sawrkar hriatpui kohhranah hian Pathian thu tak pawh an sawi ngam meuh lo turah te kan lo ngai lek lek thin a, kohhran dangte nen a va danglam em em hmel loh ve. Bengvarthlak e.

    -keimah

    ReplyDelete