Tuesday, October 16, 2007

Newsletter Sept

MyUpdate 5_10 (Sept 07)
11th October 07

Rawngbawlpui duhtakte,

Pathian kaihhruaiina class pawh thla khat chu tluang takin kan kal leh ta der mai. Taksa damna leh hriselna tha tak nen, harsatna lian tham engmah tawk lova tluang taka rawng kan la bawl ve thei zel hi Kohhrante tawngtaina rah liau liau a ni tih ka hria a, a thlamuanthlak ka ti hle. Tuntum ka haw chho hi ka rilru ah “engtinnge tun kum hi hma ka lak ang aw” tiin ka inngaihruah a, mahse hma thar han lak ngaihna a vang ka ti hle mai a. Ka naute ka zirtir thin te kha chhunzawm zel tha ka ti a, hmalakna hmasa ah neih turin ka rilru ka siam a. Tin, kan department a zirlaite tan “Free Talk” Thawhtanni apianga ka buatsaih thin kha chhunzawm tha ka ti bawk a.

Ruahman anga awm lo: Pathianthu ka zirtir thin ka naute engtikah nge kan tan leh theih ang ti a kan rawn vel chuan ka tum ang leh ka beisei angin thil a kal thei ta lova. Ka naute ho hi an Final kum a nih avangin an buai hlawm em em mai a. Kan hriat angin tunlai khawvel inelna sang zelah hian an tlanve a ngaih avangin exam hi an nei reng mai a. Chutiang a nih avang chuan September thla chu awl rih tha kan ti tlang hlawm a. Amaherawh chu a mal te te in chaweipuina te ka nei a kawmna hun tha tak erawh chu ka nei thei a ka lawm hle.

Rinna ah thang: Ka naute ho ka kawnna atangin an rinna nasa takin a thang tih ka hria a a thlamuan thlak hle in ka hria. Ka nau pakhat chuan ti hian min hrilh a, “Tunhma te kha chuan Pathian hi ka ring ve thova, mahse tunah chuan ka thinlung zawng zawngin ka hmangaih a, ka nunah hian hmun laili ber a luah tur a ni tih ka hrechhuak ta”, ti hian min hrilh a. He thu min hrilh lai hian ka hnuk a ulh teuhva, a chhan chu he ka nau hi a ka zirtirte zingah chuan a harsa ber thin kha a ni a. Mahse Pathian duhve em em in harsa ti chung chungin a kal ve tang tang a, tunah chuan Pathianin a mit a tihvar sak ta a ni. Pathian chu fakin awm rawh se!!! Hetiang anga thinlung zawng zawng a hmangaih ber a an thlan theih hun ni beisei a kan awm laiin Pathian hnathawh a taka lo lang zel hian min cho thar hle in ka hria.

A hnathawh a chawl lo: Kum thum kalta atang khan ka naupang pakhat Pathian hnena ka dil thin a awm a. Amaherawh chu ka dilna te ka duh ang erawh chuan chhan ka ni hran lo. A chang chuan ka bei te a dawng fo thin a, ka tawngtaisak tawh lo mai ang te ka ti rilru thin. Pathian erawh chuan dawhthei takin mi a nghak thin a, ka nau pawh hi Pathianin a hria a a rilru ah hna a thawk reng thung a ni. Tichuan, tun tum ka haw chho hnu reilote ah khan min rawn bia a, chaw te kan ei duh a. Holiday a hman dan te ka zawt a, chutia kan ti ti naah chuan, “Puii, Pathian ringtute leh Ctiante hi enge an danglamna?” tiin min zawt a. Tichuan, midang awmve zinga sawi chi ni a ka hriat loh avanin ka inah a hman veleh zawhna a neih zawng zawng nen lo kal turin ka ti a. Friday tlaiah a rawn kal ta a. He ka nau hian “Pathian chu ka ringa mahse Ctian chu ka ni duh lo” ti ngar ngar thin a ni a. Ama nunah hian harsatna eng eng emaw vanga hetiang rilru pu hi a ni. Tichuan, kan pahnih chuan Pathian thu kan in hrilh ta a, Pathian ring leh Ctian te inan lohna sawi tur chuan Van indonna atangin Isua pawimawhna thleng mai chu sawifiah theihna hun tha tak mai ka nei thei ta a. Pathian hmangaihna ka sawi laite hian “E! kan nu leh pa ten min hmangaih ang hi a ni maw?” tiin min zawt a. A thinlungah awmze thuk zawk a nei a ni tih ka hriatin ka lawm lutuk hi ka hi ka hnuk hi a ulh a ni. “Puii, Pathian thu ah hian zawhna tam tak ka nei a, harsatna ka neih apiangin ka rawn pan thei ang che angem?” tiin min zawt a. He hun hi hun rei taka ka lo nghah thin a ni a, lawm takin kei chuan a duh hun apianga min rawn pan theih thu ka hrilh a, tichuan hlim takin kan inthen ta a ni.

Hetia kan awm ve tawp hi: Kan hnathawhna ramah hian Pathianthu sawi har zia chungchangah chuan tumah mikhual kan awm awm love. A chang chuan keini pawh kan beidawng fo thin a ni. Pathian remruat hrelawk theiin mit nei ta ila chuan hetiang a kan beidawn chang te hi a tlem deuh tur. Nimahsela, rinna kal kan nih miau avangin beidawn changte a tam lo thei lo a ni. “Kross thu chu boral mekte tan chuan atna, keini chhandam mekte tan chuan Pathian thiltihtheihna” tih hi a dikna hi vawi duai lo kan nunah hian a takin kan hmu in ka hria. Tichuan, hetianga beidawnna rilru kan put fo lai pawh hian a khat mawi tawk hian Pathianin, nemnghehna, he laia kan awm hi a thlawn lo a ni tih min rawn hmuh tir leh thin. Thawhpuite, thiante, zirlaite nen chaw te kan ei ho chang ten an mimal harsatna te an rawn puah chhuah pui phawng phawng a, engtinge kan harsatnate kan paltlang thin tih te min zawt a. Kan nuna Pathian pawimawhna te leh, harsatna te Pathian nen a kan tawn dan te sawi theihna hun rin loh tak takin kan nei thei thin. Kan thawhpui pakhat chu, a nu leh pa te nawr na avanga pasal nei, mahse pasal neih duh silo a ni a. He mi avanga rilru mangang taka a awm thin thu te min hrilh a. Engtinge ka tih ang ti a min zawhna chu chhanna tur dang awma ka hriat loh avangin ti hian ka ti a,“I harsatna tawh ah hian a chhanna ka nei lo, mahse a chhanna neitu Pathian hnenah ka tawngtai sak thei che, chu chu ka puih theih dan che a ni” tiin ka hrilh a. Tichuan, “In tawngtai hian enge in sawi thin?” tiin min zawt a. Tawngtai dan te ka zirtir a, kan inthen ta a. Engtinge ka thiannu nunah hian Pathianin hna a thawhzel erawh chu ka hre zui thei lo, mahse ti ti na hun tha tak mai kan nei thei a, Pathian thu tlemte ka sawi thei hi ka lawm a ni.

Free Talk tan leh: Semester hmasa lama ka lo tih thin angin Monday chhun chawlh laia saptawnga tawngna hun zirlaite tana ka siam sak thin kha ka tan leh thei ta a, naupangte pawh an lo kal leh tiam tiam a a lawmawm hle.

Huikhawm sak: Hetia kan chawlh kan haw chhoh hian rilru ah kan thiante hi an la awmve angem tih hian kan hisap thin a, mak tak takin kan thiante min theihngilh tawh tura kan ngaih te hian min rawn zawng chhuak leh liam liam thin a. Pathianin hetianga min huikhawm sak leh thin hi a lawmthu sawina tur a tam hle in ka hre thin.

Malsawmna ruahpui: Xi’an ah hian kum li lai mai ka lo awm tling ve ta der mai a, tuna ka thawhna ah hian kum li na tur ka tan leh ta der mai a. Pathian min hruainaah lawmthu ka sawi lo thei lo. Tichuan, ka haw chho hnu rei lo teah kan department hotuten zirtirtu thenkhat te an rawn tirin ka inah an rawn leng a. Kan department a ka hnatawh chungchangah an lawmthu leh an theih tawp a ka dinhmun tihthat min tum sak thu te min rawn hrilh a. He thu ka hriatin ka pka hhu lo ka ti a mahse ka lawm ve hle mai a. Mahni in fak kan nihna chen a awm rualin he thu hi Pathian ropuinan ka han tarlan hram duh na chhan a awm a. Ka hnathawh an hian ka thiam vang leh ka tih that em em na a awm ka hre lova, zirtirtu ka nih angin ka thawhtur ka ti mai a ni. Amaherawh chu Pathian hian a thlante hi mihringte ngaih chuan “qualified” an ni kher lo mahse Amah zawk hian a lo “qualify” thin a ni tih hi he ka thil tawn atang hian a chiang hle in ka hria. Kan department a hotu te leh zirtirtu te nen “guanxi” (inlaichinna) tha tak kan nei a, hei hi Pathian malsawmna ruahpui vanawn a ni ka ti lo thei lo a ni.

Lawmthu leh tawngtaipuina:
A chunga ka han tarlan atang hian lawmthu sawina tur tamtak ka neih zia chu min hriatthiampui ang tih ka ring. Tawngtaipuina tur pawh tam tak ka nei a tlemte han tarlan kan tum ange.

1) October chawlhni vawi hnihna atang hian Pathian thu zir kan tan leh dawn a, engtia kalpui tur nge tih ka hriat theih nan leh ka naute mamawh ka hriatthiam theihna tur a finna ka mamawh.

2) Pathian zawng mithar min pek belh zel theihnan leh Pathian mamawhtu hriat theihna thlarau mit fing kan neih theih nan.

3) Chinese tawng lamah hian tan lak ngaihna a awm a ka hriat avangin ka theih ang angin hma ka la ve a hemi chungchangah hian taimakna, tumruhna, tih tang tang theihna, finna, etc ka mamawh hle.

Heng ka han tarlan te hian Kohhrante hnathawh Pathianin mal a sawmna tilang tu niin ka hria a, kohhrante min thlahthlam lohnaah ka lawm a. Kohhrante fuihtu leh tichaktu atan Pathianin mal min sawm sak se tih hi ka tawngtaina a ni.

Pathian ropui nan,

Puii

1 comment:

  1. Dear Puii,

    I have an unrelated query/doubt.

    Tiang ang newsletter hi nangni ho hian in rawn chhuah ziah a, chhiar te pawh a ngaihnawm em em a, thil ka han hriat ve mai mai duh chu, tiang ang newsletter chhuah hi compulsory em ni? Achhanchu in chhuah ve ziah in ka hre mai. Entir nan, tiang ang report hi thla tin in Kohhran hnenah thawn ziah a ngai emni? In rawngbawlna kal dan vel hi ka hriat ve mai mai duh vang a nia.

    Yours in Isua,

    Kima.

    ReplyDelete