MyUpdate 6-23 (March ‘08-April ‘09)
30th April 2009
In mi hriatrengna avangin lawmthu ka han sawi nawn hmasa leh duh a. Israel fate Pathian a hruai ang khan Pathian hian nitinin min hruai thin a, a chang chuan hnaite ah a inlan a a chang chuan a hmel a thukru thin. Hagari leh Ishmaela Beer-seba thlalerah beiseina nei tawh lovin thih nghakin an awm a, Pathian vantirkohvin Hagari hnenah Pathianin naupang aw a hria a, chi ropui taka a siam tur thu a hrilh a. Pathianin Hagari mit a tihvar sak a tui awmna hmun a a hruai ta a. Mihring lamah chuan beidawnna khur thuk taka kan awm lai pawhin Pathian chuan min hre reng a, kan laka a thutiamah hian a ding reng thin a, chu mi tih hlawhtling tur chuan min hruai thin a ni.
Kolossa 1:16-17 ah chuan ti hian ziak a ni: “amahah chuan engkim siam a ni a, vana awmte, lei a awmte nen, hmuh theihte, hmuh theihlohte nen, lalthutphahte pwh, rorelnate pawh, lalnate pawh, thuneihnate pawh; engkim a siam a ni; tin, ani (Isua) hi chu engkim awm hmain a awm reng a ni, amahah chuan engkim a ding ho (amahah chuan engkim a betkhawm vek) bawk a ni.” He mi chang atang hian kan nuna thil thleng hi Isua ah chuan a in zawmkhawm vek a ni, harsatna te pawh lawmna te pawh tih a chiang hle in ka hria. Engmah hi Pathian hriatlovin a thleng lova, Pathian hian a ropui nan a hmang duh thin a ni. Pathian hnathawh ka hmuh te kan han tarlang leh dawn ange.
Kross thiltihtheihna
Lal Isua thihna Krossah chuan kan sualte ngaihdam a ni a, kan zahna te lak bo a ani a, kan lungaihna te lawmna in thlakthleng a ni a, kan natna, rilru leh taksa, te tihdam a ni thin. He Kross thiltihtheihna hi kan chhungkua hian kan chang nasa hle. March thla tir khan ka pa cancer natna in a tihbuai mek chu Mumbai a check-up in a kal a, chuta chuan Doctor ten PET scan an tihah chuan cancer hrik an hmuh loh thu min hrilh a. Pathian hnathawh ropui tak avangin ka lawm a, ka pa hian Pathian tihdamna a chang a ni tih ka hria. Ka nu pawh a dam chho zel bawk a, hei hian ka rilru hahna te pawh min chhawk nasa hle. Mi tam takin min tawngtaisak thin tih ka hria a chuvang chuan han tarlan hi tha ka ti a ni.
Thihna leh Thawhlehna awmzia classroomah
Kan sawi tawh thin angin Good Friday leh Easter hma kar chho hi kan tan chuan kar pawimawh tak a ni thin a. Khawvel hmun hrang hrangah ‘Kut’ pawimawh tak a nih avangin Sawrkar pawisawi si lova Kross awmzia duhtawk a kan sawi theih hun a ni. Keipawh ka theih angin tan ka la ve leh a, class tam zawkah chuan ka duhtawkin Isua thihna leh thawhlehna awmzia, ringtu te tana a awm zia te, ka nun ti danglamtu a nih zia te ka sawi thei a ka lawm hle a. Zirlaite pawhin hriatnuam an tih hmel viauin ka hria a, ka lawm hle. Engtinge an nunah thu a sawi ang erawh ka hre zui lova, amaherawh chu kha lam chu Pathian thawh zawmah ka dah a, ka tihtur ni a ka hriatchin erawh ti thei a ka awm ka lawm hle.
Isua leh a zirtirte chanchin min hrilh thei em?
Good Friday leh Easter kan hmang zova a kar leh class lesson pangaiin ka kal pui leh a. Tichuan, Nilaini zing a ka class hmasa berah chuan dar a rik veleh hian ka student pakhat Sandy chuan, “Puii thil zawh lawk che ka duh a min pui thei ang em?” ti hian min rawn bia a. Keichuan, “Aw engtinge ka puih theih ang che?” tiin ka lo zawt vat a. A zirlaiah harsatna a nei a maw ka ti a, mahse, “Isua leh a zirtirte chanchin hi min hrilh thei angem?” tih zawhna minzawt chu ka rinloh leh ka beisei loh daih mai anih avangin keipawh ka phu deuh zawk a. “E, I duh phawt chuan ka hrilh dawn che nia, chhunah chaw kan ei dun anga chuan ka inah kan phei anga kan ti ti dawn nia” tiin ka thlah a.
Sandy hi an class ah chuan a English structure a tha ber pawl niin ka hria a, ka rilru chu a nui var var a. Pathian hian zirlai kan hma a a rawn dahte hi a tlangpuiin a thiam pawl a ni deuh zel hi a mak ka ti thin. Chuvang chuan ka rilru a lawm hle bawk. Tichuan, chhunchaw kan ei zawh chuan ka inah kan hawng phei a, a hriat duh ang te kan sawi a. Pathian Lehkhabu an mahni tawng leh saptawng inkawp chu ka pe a. “Hei hi lo chhiar la Isua chanchin chu a inziak vek a, zawhna I neih apiang ziak thla la kan zir dun dawn nia” tiin ka thlah ta a. Zirlai exam in a chhunzawm mai avangin hmuh lehna hun ka la nei lova, ka hmuh theih veleh chuan mumal taka ti tina hun kan neih theih ngei beiseiin ka tawngtai sak thin.
Pathian rin ngaihna ka hre lo
Nikum semester kan tan tirh deuh khan zirtirtu thar kan nei a, a hming chu Maggie a nia. Londonah kum nga lai lehkhazir leh hnathawkin a awm tawh a. Tunlai Chainis chhungkuaah chuan fa pakhat chauh nei an nih tlangpui avangin a ni pawh hi fanu mal a ni a. Tichuan, kan department a rawn awm tirh chuan Foreign Teacher ka nih angin inhmelhriatna te kan nei a. Chaina rama hun engemaw chen awm lo a nih avangin mahni ram mah ni se nuam a ti lova, thian pawh a nei vak lova. Hemi vang pawh hian a ni mai thei min ngaina ang reng phian a. Lunch te kan ei ho a kan chhuak dun ve zeuh zeuh thin a. Hetia kan chhuah dun tawh hi chuan ti ti chi hrang hrang kan vawrh ve thin a. Kan rinna (faith) chungchang te pawh kan sawi chhuah chang a awm thin. Kan inhmuh tantirh deuhva a thil sawi chuan ka rilru a khawih em a vangin Pathian hnenah “Lalpa Maggie I hi I hnenah ka hruai theihnan min pui rawh” tiin Pathian ka dil a.
Chaina ram hi Pathian a awm lo tih a in zirtir ram a ni tih kan hriat theuh angin Maggie pawh hi hetiang anga hrual chhoh a ni. “London a ka awm lai pawhin Ringtu inkhawmnaah te, Pathianthu an zir honaah te ka kal ve reng thin mahse Pathian hi ka ring thei thlawt lo a ni” tiin min hrilh. Engtinge Pathian hi ka hmelhriattir theih ang aw… ti rilru rengin ka kawm thin a. Semester thumna kan kai chhoh chuan kan innel viau ta a, tichuan May ni 14 chhunah ka inah chaw kan ei duna chutah chuan Louie Giglio thusawi “Indescribable” , arsi lam zir mi ten a science hmanga kan awmna lei lung leh a pawn lama arsi an zirna a an thil hmuhchhuah hmanga Pathian ropui zia leh sawifiah zawh sen rual a nih loh zia a sawina a ni a. Engtinge Pathianin hna a thawh dan tur erawh chu ngaihtuah thiam lo chungin bang lovin ka tawngtaisak zui ta char char a. A karleh ni May 19 ah chuan ka tawngtaina rah hriat ka duh avangin lunch eipuiah ka sawm leh a. Amah chuan kan Pathianthu ngaihthlak chungchang chu a rawn sawi chhuak ta a. “Puii, Pathian tan hian thliarkarte hi lei nawi te tak te ang lek a nih chuan engtinge a nihna chiang taka a hriat theih?(Isaia 40:15 NIV)) , tiin min zawt ta a. Ka thinlungin lawmthu ka sawi nghal mawlh mawlh a. Heti hian ka chhang ta a, “Engkim hi a siam a nih avangin a hre vek a lawm” tiin. “I duh chuan kha pa thusawi tho “How great is Our God” tih kha kan en dun leh dawn nia ka ti a, a ni pawh chuan tha a ti a, remchang hmasa bera inhmu leh turin kan inthen a. (Louie Giglio thusawi pahnihna hian kan taksa "cell" a protein pawimawh ber mai pakhat chu "Laminin" a nih thu leh a pianzia chu kross ang chiah a nih thu a tarlang a. Kan taksa phuarkhawmtu pawimawh ber mai kross pianzia a nih ang hian Kross hian khawvel a thil awmzawng zawng a phuarkhawm zia a sawifiah.)
Pathianin hun tha tak min siamsak lehin May 28 chhunah Maggie lunch eiin ka inah a rawn kal leh a. Kan harsatna te inhrilh tawnin hlim takin hun kan hmang a, chaw te kan ei khamah Pathian thu chu kan ngaithla duh leh ta a. Ka thahnemngai lutuk hian ka nawr nasa lutuk anga a hel ang tih ka hlauh avangin kan thil en chu ka comment duh miah lova, chuan movie dang kan en zawm a. Maggie lo kal hma hian “The Purpose Driven Life” Rick Warren a lehkhabu kha zir nawn leh ka duh avangin ka bih a. Ka thinlungah hian Maggie hi zirpui theih ka chak khawp mai a, Pathian hnenah ka dil a. A lo len lai chuan chumi lehkhabu in a a thil tum vel chungchang chu ka hrilhfiah a, mahse zirpuiah chuan ka sawm ngam chiah si lova. A haw tur chu ka thlah ang che ka ti a kan chhuak dun a, thil hrang hrang kan sawi a, a tawpah chuan, “Maggie ka lehkhabu hmuh che kha zir ka duh a min zirpui duh em?” tiin ka zawt ta a. “E! a that hlauh chu Kristianna lampang lehkhabu zir ka lo tum lai tak a nia, Koran pawh ka chhiar tawh lo a harsa ka ti lutuk a” tiin min chhang ta chu ka thinlung hi a HALLELUI pawp a ni. A remchang hmasa bera zir tan turin rem kan siam ta a ni.
Tuna ruahmanna ka neihah hian Pathianin engtinge hna a thawh dawn ka hre lo, nimahsela thlaraubo te chhanchhuah a an awm hi a lawmzawng a nih avangin Amah vek hian a duhzawng chu a ti hlawhtling ngei dawn a ni tih ka hria…rinna in.
Lalpa chu fakin awm rawh se.
