Cai Shen 財神 - Hausakna Pathian

Thangthar Chainiste hi an sawrkarin Pathian a awm lo tih a zirtir avang leh Pathian ringte tan pawh ualau taka an sakhuana kalpui an phal loh avangin sakhuana puithunaah inhmang vak lovin kan ngai fo thin. Amaherawh chu tun thleng hian an hnam puithuna atthlak "superstition" leh an hmanlai sakhuana hian an nitin khawsakna leh an thinlung chhungrilah hian hmun a la luah thuk hle. Zawi zawiin sawrkar pawhin heng an hnamzia a bet nghet tak mai an "Kut" pawimawh leh an sakhhuana puithunna thenkhatte hi a tuaithar nasa hle a, zawi zawiin mihring pawh an rinnaah an zalen chho zelin a lang. 

Taosism sakhua leh Buddhist sakhaw ah hian Caishen  财神, "Hausakna Pathian" an tih bawk chu, Chainis te hian an be thin a. An ngaihdah chuan he pathian hian thiltihtheihna chi hrang hrang a nei a, kawlphe leh tek tibo theihnate, a chibai buk tute sum leh pai hausakna pek theina neiah an ngai bawk a. Sakei dum chungah chuanga thirtiang kengin a lem hi an ziak thin a, hmuihmul chhah tak mai leh hmai rawng dum an neih tir a, thir lukhum an khum tir bawk thin.  

Chinese New Year lawmnaah hian Caishen hi a pawimawh ve hle a, a bik takin New Year ni atanga a ni nga naah (5th day of the lunar year)  hian mi tam tak ten Templeah kalin hal rimtuite kengin amah an be thin.Tin, 恭喜发财 GongXiFaCai ( Congratulations and best wishes for a prosperous New Year or Congratulations on becoming rich)  tiin duhsakna an inhlan tawn thin a ni.  

Vawiin February 14, 2013 hi Chainis hovin an pathian CaiShen tana an hman bik ni a ni. Zing dar 7 vel atangin halpuah an hal tana nilengin halpuah thawmin khua a nghawr a ni. Hausak loh hi an hlau hle mai a, a tul a nih chuan sum leh pai hausakna neih theihna anih chuan halpuah tamtak man to tak tak hal ral pawh pawi an ti lo ani. Chuvangin maktaduai 7-8 vel chenna khuaah hian hausak duh tam tak an awm avangin vawiin nangiang chu kan va ri nasa tehreng em!!

恭喜发财!!!

Kumthar China a An Lawm Danin

Chainiste tana kum khat chhunga hun pawi ber mai Spring Festival "Chinese New Year" tih a kan hriat thin lawm tur hian Chaina ram chhunga mi zawng zawng an phu suau suau thin a. Hetih hun lai hi zin vei vak tam ber hun lai a ni a, mihring maktaduai tam tak nitin maiin an chhung leh kua te bula he hun pawimawh hman loh hlau hian an pian leh murna khua, an hmangaihte awmna khaw lam pain an hawng sup sup thin a ni. Ringtuten Krismas kan hman ang hian, an hun pawimawh ber a nih avangin chhungte tel lova hman an hlau em em thin a ni. Chainis ni lo Chaina rama awmte tan pawh hetih hunah hi thiante tawngkam tha changin Spring Festival hmang tura min sawmtu kan lo chang ve ran thin, kan vanneih chuan student hlui te, thiante min sawmtu an awm ve neuh neuh thin. 2013 Spring Festival hi February 10 a ni a, keipawh ka student hlui leh thian Kareni chuan an inah an Kumthar hmang turin min sawm ve a lawm takin ka YES a, February ni 7 khan an khua "Sufang" lam pana kal turin ka inlum nuam tak ka chhuah ani. 

Sawi tawh angin zin vei vak tam ber hun lai a nih avangin Bus Station ka va thleng chu mi an lo tam hle mai a, ticket ka lei a, bus lawn tur a kan intlar chu Dragon sei tak ang mai hian kan kawi nuai mai a ni. Ka naute khaw bus hi Xian atangin a awm loh avangin Fuping khuaah ka tawp phawt a ngai a, (He khua hi Chaina ram President thar ni mai tur Xi Jinping pianna khua a ni) he khua a kal tur hi an lo tam em em mai a. Darkar hnih ka intlar hnuah busah ka chuang ve hram a ni. Tichuan, tlai dar 5:30 velah chhuakin Fuping khua tlai dar 6:30 ah ka thleng a, chu khuaah chuan ka nau nen an chhungte inah kan riak a. A tukah chuan ka nau nuteii chuan Sufang khuaah a motor in min thlah chho ta a. 

Khua kan thlen chuan an kawngpui pawimawh ber chu bazaar lian takah an lo chantir a, kawngsir velah an "kut" inbuatsaihna chi hrang hrang atan thil an lo zuar a. Keini pawh kawng thawl laiah motor dahthain bazaar te chu kan fang kual vel a.  Kan fankual hnuah ka naute in lamah kan thleng phei a, central heating an neih ve loh avangin a vawt tha hle. 

1. People selling "Duilian 对联” the couplet that they put up on their doors, on the streets in preparation for Spring Festival 2013

2. Firecrackers an item that is an essential part of the whole celebration on the streets of the village market. 

3. People buying and selling food items- pickled radish, tofu, vegetables, sprout beans, mantou (steamed bun), crackers, etc as a part of their preparation to celebrate the festival. 

Chainis Spring Festival/ New year hi "Thla Calender" (Lunar Calender) hmanga chhut a ni a. Kum 2013 atan hian February ni 10 a ni a. Dan tlangpuiin he kut atan hian an inbuatsaih nasa thei hle a, in leh a chhehvel te an tifai a, thawmhnaw thar an lei a, midang thilpek (present) tur an lei khawl a, an theih tawpin an in buatsaih thin a ni. Chuvangin an bazaar pawh a lun thei hle a ni. Tin, Spring Festival a hnaih hi chuan rukru pawh khawlaiah an pung nasa hle thin. 

Chainis hian Urlawk zan kan tih hi Chuxi “除夕” an ti a. Hemi niah hi chuan an buai thei hle thin, chawhma lamah kumthar lawmna atana an mamawh zawng zawng, ei leh in tur te, in cheina ang chi te leh halpuahte an lei fel vek a; in lam tihfai ngai an tifai vek bawk a. Tlai lam inlam hna an zoh fel hnu chuan "laltin" te, Duilian 对联 (couplet) te an kawngkharah an tar a. Khaw hrang hrangah hian an tihdan a in ang vek hran lova, ka zinna khuaah chuan Duilian an kawngkharah an tar zo chu halpuah an hal chur chur a, hmun thenkhatah erawh chuan halpuah an hal hran kher lo. 

Ka naute in khawngkharah hian "Duilian" hi an tar ve lova, a chhan ka zawh chuan a pu thihna kum thum a la tlin loh avanga bel lo an nih thu min hrilh a. 

5. People hanging lanterns and putting up the couplet (duilian 对联）on their doors.

Khua a lo thim chuan mahni in lamah an hawng, chhungkaw kimin chaw an theih ang anga tui leh tha an siam chu an eikhawm a, tihtur dang an zawh tawh avangin TV hmaah an thu a chhungkaw kimin CCTV New Year Gala programme an en khawm thin. He programme hi 700 million chuangin an en thin a, drama te, lam te, zai te, fiamthu te an lantir thin a, darkar 3 chuangte a awh thin a ni. 

Zan dar 12:00 a lo rik chuan, khua chu halpuah ri in a tuam vel a. Suangtuahna ransa (mythological animal)  tihbaiawm tak mai  "Nian shou 年兽 " an tih chuan mihhring a ei thin a an hlau em em mai a, mahse chu ransa chuan hlauhawm tak mai chuan  "ri" (sound), "eng" (light)  leh "rawng sen" a hlauva an hriat avangin in tin mai chuan an kawngkharah lehkha sen an bel bakah chuan zanlaiah chuan halpuah an hal chur chur mai a, chuvang chuan khawnawt chuan kan ri chuah chuah mai a ni. 

6. The mythological animal Nianshou 年兽 .（source: fr.guildwars.wikia.com)

7. Making lots of noise on the street because Nianshou 年兽 is believed to be terrified of loud noise. 

8. The remains of the firecrackers that was burned at night to protect themselves from the mythological animal "Nianshou 年兽”

Zing a lo nih chuan in tin mai kawtlai chu halpuah halna hnu chuan a sen nguai hlawm mai a ni. Chainis rin danah chuan Kumthar ni hian inchhung atang hian engmah paih chhuah leh phiah fai thianglo a ngaih a ni, "vanneihna" an paihchhuah emaw an phiah bo palh tak hlauvin. Chuvangin heng halpuah an halna hlui pawh hi Kumthar ni hian an tifai ngai lo a ni. Mi thenkhatten khawlaiah kuang leh rithei chi hrang hrang an siam a, an ransa hlauh Nianshou an tih chu hnawh bo nan an ti bawk a. 

Zing chaw kan ei kham chuan kan inti fai sawk sawk a, mi lo lenglut te lo lawm turin kan lo inbuatsaih a. Kumthar tuk hian chhungte leh thianthate inah thilpek kengin an tlawh kual a, kumthar chibai inbuk kualin induhsakna thutha tak tak an inhlan kual thin a, "Bainian 拜年" an ti bawk a. Khawlaiah thilpek kengin an intawk suau suau mai thin a ni.Hetianga kumthar chibai inbuknan hian tawngkam hman bik an nei thin a, 新年快乐 Xin nian kuaile, 过年好 Guo Nian Hao, 心想事成 Xin Xiang Shi Cheng tih te leh hetianga induhsakna thu hrang hrang hmang hian an in chibai kual thin a ni.  Kumthar ni hmasa berah hian an pate, an pasalte lama an chhungte inah an kal  tlangpui a, a ni hnihnaah hian an nute, an nupuite chhungte tlawhnan hun an hmang ve leh thin a ni. 

8. People visiting relatives to give their New Year greetings or Bainian 拜年。

Hetianga an chhugte an tlawh zawh chuan hunawl an neih veleh thenkhatten "mahjiang" (mahjong) te an khel a, thenkhatin card te, Chainis chess te an khel a an theih ang angin an intihlim thin a ni. Chawhnu lamah chhun chaw chhungte nen eirawng an bawl hova, eitur hun dang aia hnianghnar tha in an buatsaih bawk a, hlim takin an ei thin a ni. 

9. People playing mahjong with a deck of cards and enjoying the sunshine on a New Year's day.

Ka thlennate chhungkua hi pathum chauh an ni a, ka hrehawm an hlau hle maia an thiam ang angin min duat ve hle. Vanduai thlak tak maiin an tui kawng khawvawtin a hmet khawng a, inah tui hawng tur a awm loh avangin ka cham chhung ni 5 lai mai inbual lovin ka awm a, mahse Chainis thingtlangah chuan an inbual khat hle an ti a chuvang chuan ni 5 chhung chu lungawi takin ka tuarve a ni. 

In leh lo tha tak tak an nei hlawm a, mahse thil pakhat nuihzatthlak ang reng tak mai chu "ekin" lamah hian an thang vak lo a ang hle. Ka thlenna te pawh hian in zaupui ft. 130 dawn lai mai a thui an nei a, an in hnunglamah chuan ram awl tlem a awm a chumi kilah chuan lei hi tlem an laikhuar a, chutah chuan kan inthiar thin a, kan inthiar zawh a lei kan vur thin a ni. Mahse hengte hi ka tan chuan "experience" tha tak mai a ni ve a, hetiang tawng thei a awm hi a lawmawm hranpa ve hle in ka hria. Tichuan, Chaina ram hriatthiamna thar neiin February 12 khan Xi'an lamah mahni inlum nuam takah ka thleng leh ta a ni.

"Hotpot" titi

Hotpot a Chinese delicacy

Hotpot hi China rama ei leh in an neihah chuan a tui ka tih pawl tak a ni a, a tui mai bakah thian kawmna hmanraw tha tak a nih avangin thiante nen "Hotpot" ei hian kan chhuak ho fo thin. Vanneih thlak takin ka bul hnaiah hian ka student hluite hnathawkin an awm ve neuh neuh a, inkawm hona hun remchang tak a nih avangin Hotpot ei tur chuan ka sawm hlawm a. Darkar hnih thum lai chaw ei a han thut chuan titi a kal kual nasa thei hle a, zanin kan eihkawm ti ti hian rilru a thlek kual tir nasa deuhva sawi chhuah lohvah chuan uihawm ka tih avangin han tarlan ka duh deuh a. Thenkhat tan chuan 'ei' pawh a har deuh mai thei a ni. 

Ka naute pahnih ka chhuahpuite hi ringtu an nih ve ve an nih avangin an chanchin hi hriatnuam ka ti a ka zawt thin a. Ka zirtir thin lai khan ka nau A-i hi ka hriatchian vak loh avangin ringtu a lo nih dan te ka zawt a, ka nau B-i hian biakinah a hruaive atanga ringtu lo ni ve tan a ni thu min hrilh a. Tichuan, 2006 atang khan a inkhawm ve ta char char a, amaherawh chu 2010 atang khan a an biakinah a inkawm duh tawh loh thu min hrilh a. A thil min hrilh chuan rilru a kal kual thui tir em avangin leh ngaihtuah chian atan a tha ka tih avangin sawi chhuah atana a that leh that loh pawh ka hre chiah lova, thil nihna tak tak hi a mak theih em avangin sawi loh harsa ka ti a. Mi thiltih a ngaihdan lo siam vak leh an khawsak phunga ro lo va rel sak hi ka tihtur a ni lo tih ka hria, Baibulah pawh chiang takin a inziak a, amaherawh chu ringtute hian Baibul hi kan khalh khawloh nasat theih zia leh midang chunga thuneihna lekkhawh (control) nan te, mahni thiltum tihlhawhtlin nan (Pathianin titur a min duh nilo), chhungkua mimal anga in lak hausaknan te hian kan hmang fo thin niin a lang (Pathianin ringtute rethei turin min duh ka tihna ni lovin dik famkim lova pawisa lakluh ka sawi tumna a ni). Mihring kan nihna rilru dik tak ti ila a dik thei awm e. Tin, sakhuanna piahlam khawvel inrelbawlna hi kohhranah hian kan lakluh nasat zia te pawh hian ngaihtuah a ti tam hle. 

Tichuan, ka nau A-i chu Pathian a rin tirh a a inkhawnnah chuan a inkhawm ta ngar ngar a, hun engemaw atang khan Baibul a chhiar leh an Biakina an zirtir inan lohna leh an zirtir inmil lo chu a hmu chhuak ta zeuh zeuh a. Entirnan, an kohhrana inkhawm thin nula dangte nen in an luah hova, zan dar 10 hnuah tui an lum theih loh te, dan an zawm loh chuan an sual kohhran hmaah an puang tur a ni tih te; baptisma chang tura an inbuatsaih laiin an hriattheih china thil an tihsual tawh zawng zawng an ziak chhuak tur a ni a chu chu kohhran hmaah an puang chhuak tur a ni; hmeichhiain mipa a ngaihmelh emaw hmeichhiain mipa a ngaihmelh chuan kohhranah a sual a puang tur a ni; hmeichhia in biakinah pawnfen chhing lutuk a lo fen chuan kohhran atanga hnawhchhuah theih a ni; hengte hi entirna an tarlan thenkhatte a ni. Ka naute Biakin hi Chainis ringtute kaihhruai ni lovin Kawrian ho kaihhruai a ni a. Kawria ram atang hian rawngbawltu tam tak hi rawngbawlin an awm a, Chaina sawrkar dan phal loh nimahse pastawr tam takin kohhran an rawn dinin Chainis ringtu te an kaihruai thin a ni a. Sorkar in hetiang anga lo lut ramdang mi hi a vai reng thin a, an man chhuah chuan ram atangin an hnawtchhuak a, amaherawh chu a tuartu tak tak chu an hawnsan tak a ram neitute an ni fo thin. 

Kawria ram kan hriat thin dan chu ringtute inpekna leh tawngtai mi an nihna te rawngbawlna lama an inhman nasat zia a ni thin a, a dik ngei a ni tih pawh a hriat. Mahse Chaina rama rawngbawla rawn kal tam tak te hi an "legalistic" hle a, an kohhran dan leh hrai zawm leh zawm lohah hian an khauh em em a, a zawm lo te hremna pawh an ti na hle.  Tichuan, ka nau chu tunah hian inkhawmna tur hre lovin an awm ta a, kohhran dangah an rinna an ngah ngam loh phah a ani. Kohhran belh tur hre lovin hun rei tak chu a awm, mahse vanneih thlak takin ka nau B-i chuan an inkhawmnaa kal ve turin a sawm hlauh a, tun chawlhni atang chuan an inkhawm dun theih ve ngei ka beisei. 

Engpawh nise, ka thil ziah hian keipawh ka rilru a tibuai khawp. Ka ziah chhuah duhna chhan pawh hi ka hrethiam chiah lova..mahse ngaihtuah a tithui em a ka han sawi a ni. Ka sawi duh tak ber ni a ka hriat chu Chaina rama ringtu te hian tawngtaipui an mamawh. Chanchin tha dik tak dawng lo hi tam tak an awm a ni. Lal Isua thihna khan Setana kut ata min la chhuakin zalenna min pe a, chhanchhuah kan nih hnu hian mahni siam chawp jail ah hian ringtute hi kan tang fo ani. Kohrannte kan mutan ni a lang chu chanchin tha phenah "Legalism" dan leh hrai (dan leh dun) leh a kaihhnawihah hian buaiin kan tang a, Lal Isuan zalenna min pek theihnghilh thakin kan buai ral leh fo thin a ni. Mi tam takin ringtute min ngaihnat theih lohna chu kan nun a zalen lo hi nita ber hian ka hre thin. Lal Isua min pek zalenna hi kan nun chhuahpui thei lo, kan nun min tehtu tur Lal Isua ni si hi ringtu leh ringtu inkarah hian roreltu "referee" ah kan insiam a, tehfung kan siam chawp ve te hian midang kan hmu tling lova, Lal Isua tehfung hman nachang hre lo hian. Lal Isua lakkhawmpui lo hian a vaw darh tu kan ni fo thin a ni. 

Ka thiannu pakhat chuan a thuruk min hrilh dawn a mahse min hrilh hma in, "Don't judge me" a ti phawt a, ka rilru a na zawk a. Engvanga kha thu kha sawi hmasa nge a nih tih ka zawh chuan ti hian min chhang a, "It's because Christians are so judgemental." Ka lungawi lohna ka tih lan dawn chuan a thil sawi kha a ti chiangtu mai ka ni dawn si. Ka ngawi a, a thuruk chu ka ngaithla a. Mahse, he ka thil tawn hian nasa takin ngaihtuahna min neih zui tir bawk a ni. Mi tam tak ringtu an nih chak lohna chhan chu ringtute nunah hian danglamna an hmu lo fo a, misual, mitha, an nihna anga pawm thiam thlarau zalen hi an hmu lo fo thin chuvang chuan ringtu nun hi fimkhur a van ngai tak em!! Tumah hi mi famkim kan awm lo, amaherawh chu mahni ngun taka in enfiah thin hi a pawimawh hle in ka hria. Thil kan tihsual pawh a, "Pathian in min hmangaih a, ka tan a fapa a thi a ni" tihah hian innghah tlat a, mahni tlin lohna hai chhuah ngam te hi a pawimawh hle in ka hria. Chuta tang chuan Pathian hian mi hi a lo hmang fo thin. Mi fel famkim nih tum lova, tlin loh ang zel a Pathian nen a kal thiam apiangte hi Pathian hian a lo hmang duh mai thin a lo ni. Tu mitah mah hian kan tling famkim dawn lo, chhungte,  thiante, thenrual tha te, kohhran huang chhunga mite- kan tilawm zo tak tak dawn chuang lo. Mi dang kan hmu tling lo fo ang hian mi mitah pawh hian kan tling zo dawn chuang lo a ni. Pathian mitah pawh kan tling zo lo a ni. Chuvang chuan a ni kan tlinna tur Lal Isua min pek. Lal Isua Lal leh Chhandamtu a kan pawm zarah Pathianin tlingah min pawm ang hian midangte pawh hi tlir thei thin ta ila chuan nasa takin Pathian ram hi a lo zau phah theih ngei ka ring a ni. Mahni in enfiah reng erawh chu a ngai a, mahni in enfiah ngam tur erawh chuan huaisenna neih a ngai fo thin. Mahni nihna thalo hmuh chhuah hi thil nuam a nih loh avangin kan haider fo thin. Hei hian Pathianin a min din a tum dan leh min chher a tum dan min hmuh chhuah tir thei lo fo thin a, chu chu rawngbawlnaah pawh hian kan mutan a ni fo a, midanga harsatna siamtu pawh a ni thei fo thin...

Ka ziak thui ta hle mai ka ziak buai tanin ka hria chuvangin heta ka tih tawp loh chuan ka thil sawi duh leh ka rilru a awm pawh ka sawi buai tan tlat.....

Rukru vulh lenna khawpuiah!

Mahni phak tawkah chuan ka fimkhur ve hle in ka hre thin a, mahse awmna hmunin a zir loh hi chuan fimkhur eng ang mah ila inven sen loh chin a awm thin a ni hi. Vanduai thlak takin nimin piah khan rukru lakah ka inveng seng ta ngang ta lova, ka purse min ruk sak a, rilru a na ve duh hle mai. Hemi ni hian vawi khat chiah ka purse hi ka la chhuak a, chhun chaw ei man ka pe a. Tichuan, Bell Tower bul maiah hian Kaiyuan Shopping mall a awm a. Spring Festival a hnaih tawh avangin he shopping mall hma pawh hi nalh tak a chei mawi a ni a. Chumi thla lak chu ka duh avangin ka bag chu ka hawnga camera ka la chhuak a thla ka la a, ka camera pawh chu ka bagah chuan ka thun leh mai a. South gate lam panin pheikhawk dawr ka ngainat deuh mai pahnih awmna lam chu ka pan phei a. Sale an lo neih nual avangin pakhat chu lei turin kan inruahman ka bag kan hawng chuan ka purse chu ka hmu ta lo a ni!! Hrilh a hai duh hle!! Kan ngaihtuah ngial pawhin ka bag ka hmaah zel ka dah a, tha takin ka khar leh zel bawk a, ka hawng a nih pawhin ka thlalak kar lek kha ka hawn chhun chu a ni mai si!! Rukru zei lakah chuan ka inveng seng ngang lo a ni!!

Kum 2010 January 1, khan ka jacket pocket atangin ka mobile phone min ruk sak tawh bawk a. Tin, tunkum Christmas hma lawk khan ka nau a purse chhunga Yuan 1000 awm an ruk sak a, ka thianpa a iphone an ruk sak bawk a. Hetiang hi nitin a thil thleng a ni.

Xi'an khawpui hi khawpui upa leh Dynasty hrang hrang 13 lai in khawpui a an loh hman tawh a nih avangin a chhunga awmte pawh hi an inchhuang thin. Rukru tam lamah pawh hian inchhuang dawn se chuan inchhuanpui tham khawp a rukru tamna a ni leh thung. Hetiang a rukru an tam em em nachhan ni a lang chu mipui mimir hian rukru te hi an hlauh vang ti ila kan sawi sual lovang. An bul hnai maiah hian rukru in mi bag lo zen ta se an en liam mai mai ang!! Achhan an sawi thin chu, "i hmel a chhinchhiah anga, hmun falah a chang ang che anga a that mai ang che" tih hi an in hrilh dan a ni a, chuvang chuan rukru man tu nih hi tuman an duh lo a ni. Chuvang chuan rukru te hi an zalen em em mai a ni. A tuartu vek an ni si a, mahse khawtlang a lo him zawk nan a misual dawr chu tuman an duh leh thak lo a ni.

Ka ngaihtuah neuh neuh hian, he ram ralmuang lo leh tihbaiawm ru tak maiah hian Pathian chuan min dah chu a ni si a. Hetiang harsatna han tawh chang hian "Engatinge Lalpa hetiang misual awmkhawmna hmunah hian min dah" tih mai te hi a awl rum rum thin. Mahse, ngaihtuah ril deuh chuan, "kha tak kha a lawm helaia ka dah chhan che, ka hmangaihna an hriat loh avangin hetiang nunphung duhawm lo tak tak hian an nunga, Pathian nei nun danglamna kha i lantir a ngai a lawm," ti hian Pathian hian min chhang thin in ka hria. Chuvang chuan harsa ti tak chung hian Pathian ring chungin kan kal ve leh mai thin a ni.

A tawpah chuan, kan nunna zuah a a la awm te, duh zawng ei leh in thei a kan awm te, chenna in leh lo, mahni ta ni lo mahse, min pe te, hriselna tha tak min pe te, hmangaihtu min pe te hi lawmna chhan tur tha tak leh khawvel awm chhunga hlimna min pe thintu te an lo ni mai a ni. Chuvang chuan bo thei, chhe thei, ral thei, chuai thei, kan thil neihte hi innghahna tak tak tlak an lo ni lo a ni. Pathian a inngah hi a lo him ber zel mai a lo ni e.